Kum 35 Chung A Thlahlawh Tam Deuh Cu Ngakṭah Bawmhnak Caah A Hlutu

Midang bantuk in riansang a tlai kho le officer lianngan zong a si theng lo natein, a thinlung a rummi a si khawh hi ngakṭah buangro pawl caah zeitluk in dah ṭhahnem santlai a rak si. 

Librarian rian ah kum 35 chung a ṭuan lioah a hlawhmi dihlakte ti awk in ngakṭah le Children’s Welfare Fund caah a rak hlut hna i, hiti amah nakin bawmh a herh deuhmi pawl a bawmhchanhmi hna hi aa lawmhnak sang bik cu a si tawn. Kum 73 upa a si cangmi Pu Kalayanasundaram nih cun vawleicung ah mirum bik ka si tiah aa ti. 

Amah hi Tamil Nadu lei miphun a si. Hi atu bantuk in mi harsa le rethei bawmhchanhnak a hlutmi ruangah hin cawimawinak laksawng zeihmanh hmuh aa tim balmi zong a si lo natein, atu bangin thilṭha a tuah tawnmi a thei hngaltu nih a thil tuahmi an philhpiak hrimhrim lo. A rianṭuan chungah rianṭuan felman ah ti’n cawimawinak lawmmam le laksawng tampi zong an pekchanhmi a si.

Library Science ah Gold Medal minṭhat cawimawinak an pek i, ‘Man of the Millenium award’ zong an pekchanh rih fawn. Hi minṭhat cawimawinak laksawng a tincomi ah Million 300 (approximately $4.5 million) aa tel chihmi a si i, mah cu zong cu ngakṭah zohkhenhnak ah ti’n a hlut dih rih hna lengah, A pensen hlawh phaisa million 1 (approximately $15,000) zong cu a hlut chap rih hna!

Hiti atu bangin phaisa hlut lawng nih hin a lungdi a riamh kho hrimhrim lo i, zeitluk in dah ngakṭah, sifak, miharsa le rethei hna nih hin harsatnak an intuar ning a si timi tehton duh ruang hrimhrim ah ti’n lamsir le tlanglawng dinhnak hmun tepawl ah zenhnak thinlung ngei lo tein a riak i caan a hmang ve tawn.

Upat awk a tlak taktakmi putar pa hi a tleirawl lio caan tein mi harsa bawmhchanh hi a rak huammi le a duh zungzalmi a rak si. A hringtu a pa nih a hmet lio kum khat a rak si lioah a thihtak i, a pa nih a thihtak hnuah hin a hringtu a nu nih mual a liamtak ve ṭhan hoi tikah nun harsa ngakṭah dirhmun in khua a rak sak tikah amah le mah nunnak rak i lak duhnak thinlung tiang in lungrawhnak depression a rak ngei phah. 

Hiti a um lio caan ah a thinlung a hun thlengtu pakhat cu a relmi ca a si. Cu a relmi ca cu, “Midang nih na konglam/tuanbia a ṭhatnak lei in an in chim khawh nakding caah na thinlung in biachahnak hnget ngeih i zuam,” timi bia nih hin atu a dirhmun mi bawmhchanh duhnak thinlung taktak ngei dingin a nunlam hi a rak thlenmi a si.

A sining kong a chimnak ah, Pu Kalyanasundaram timi nu le pa dawtnak tang hmanh ah a ṭhanglian lomi thinlung ruahnak kha midang caah thluachuah bongmal pek in a um. Ka umnak hi khuate a si i, lamṭha zong a um lo, bus tehna, electric tehna, sianginn tehna zong a um lo tikah siangin kainak ahhin nifatin khan 10 peng lam kal a hau zungzal i, cuti tecun nifatinte umhar taktak in keimahte lawng sianginn ka rak kai ṭheo tawn. 

Cu bantuk dirhmun tein sianginn kai ka rak teimak lio caan khan midang sianginn kai ve dingah ka forhfial tawnmi hna le ka ngeihchun hnipuan hrukaih awk le thil dang tete ka ṭhenhcheu tawnmi hna cungah a rak ka nihsawh len zong an rak um tawn ve.

Oikhat cu Indo-China War lio ahkhan P.M Jawaharlal Nehru nih Defense Fund a pek ti thawng ka rak theihhngalh tikah, thil pekchanh hlut lei cu ka thinlung tak tein ka duh bikmi a rak si ve ruangah Tamil Nadu Chief Minister sinah ka va kal zau i, sui ṭhi ka rak ngeihchunmi te cu ka rak hlut ve. Sianghngakchia dirhmun in thil a rak hlu hmasa bik pawl cu ka si men lai dah tiah kaa ruat.

Rethei harsa bu tein sianginn a rak kai ve ceomao i, sianghleirun tiang pehzulh tein a kai hnuah Librarian rian hi a rak ṭuanmi a si. Hi a hlawhmi hi amah nun diriamhnak men le nuamhnak lifestyle lei caah hmang lo tein miharsa ka bawmchan kho hna lai lo ti a ruah ruangah amah nih aa hman dingmi rikhiahnak a tuah i, a thla hlawh Rs. 140 in Rs. 40 cu amah hman dingah a chiah zau i, Rs. 100 cu mi bawmhchanhnak caah thla fatinte a rak hlut zungzal tawn.

Hiti hin a hung kal chin lengmang i, caan zeimaw zat a hung rauh ve tikah cun (Non-profit group) ‘Paalam’ timi cu a dirh i, atu chun ni tiang midang bawmhchanhnak rianṭuan in Chennai ah khua a sa. Hi a dirhmi an phu pawl nih hin fim cawnnak lei ah hngakchia kutrit tehna, midamlo le kutke tlamtlinglo pawl, sii/zuu tama pawl a lakka tein chimh cawnpiak le zohkhenh kha tuchun ni tiang an ṭuanmi cu a si.

Hi bantuk dirhmun in bawmhchanh a herhmi pawl a bawmchanmi hi miphun dang ahcun hmuh awk an um len hna. Kanmah Chin (Lai) miphun chungah hin minung pazeizat dah kan um ve hnga? Asiloah min langhter duh loin mi bawmhchanh a hmangmi tel cu kan um len ko lai tiah ruahchannak nganpi ka ngei. 

Ramdang bawmhchanhnak tel loin kanmah miphun kutke thlati chuak in hmuhmi tein kanmah miphun chungah mi tlamtlinglo le miharsa le ngaktah, tarnu tarpa, tbk. zohkhenh hau in a ummi hna bawmhchanhnak thazaang kan chuahmi hi kan miphun le ram thluachuah hmuhnak hrampi pakhat a si. 

Kan baibal chung zongah kan hmuhmi cu ‘hmuhlei nakin peklei ah thluachuahnak a um deuh’ tiah a ti. Miharsa, misifak, rethei, lungrethei, sii-ai tama, pum tlamtlinglo, tarnu tarpa dawt, zohkhenh le bawmhchanh hna hi Khrihfami hna le Ram le miphun ka daw a timi hna nih kan ṭuan dingmi kan rian a si hnga lo maw? #

(Theihternak: Hi a cunglei tuanbia tawite hi Facebook group pakhat ah ka relmi a si i, Laiholh he aa tlak ning in ka rak lehchinmi a si.)