Thong Ni Le Caan A Phan Taktak Cang- Mayweather Vs Pacquiao

Pacman vs Mayweather

Vawleicung mizapi nih zoh lai aa ngaih tuk hringhranmi, an i thong lai ti le thong lai lo timi bia chawkvak a lengmi nih nitlaklei media ah hmun zeimawzat a lak hnuah an i thong ding ni le caan cu a hung chuak taktak ko cang ai! 

Atu ahcun hrihrual kulh chung (ring) ah boksing thongh minthang pahnih Floyd Mayweather le Manny Pacquiao thongh ni caan cu a phan cang.

Thaizing Zarhpini zing ah boksing aa thong ding minthang pahnih cu vawleipi nih kan cuanh cang hna lai. 

Hi hna pahnih thawngpang hi vawleicung huap media lian timi thawngcabu cahmai latu bik tiang an phan. Cucu a si ding zong a si ve ko dah ngai. Zeicahtiah Mayweather le Pacquiao hna hi vawleicung boksing thiam ropui bik veve ah ruahmi an si i, heavyweight boxing thlihran thawng a hun daih lingcing ah vawleicung thongthiam minthang pahnih aa rilh taktak ding tiah ruah veve mi an hun i thongh ding cu vawleipi nih hin hmuh a rak cak taktak ko timi a lang. 

Kum 1980 lio caan hrawng Sugar Ray Leonard, Thomas Hearns, Roberto Duran le Marvin Hagler tepawl an chanlai lio bangkhan boksing thiam minthang aa thong dingmi hi hmuh an har hringhran cang. Hi hna hnuah atu hi boksing minthang pahnih tiah ruahmi pahnih a hun tong cu vawleipi nih aa ngaih hringhran i, sunglawi tuk ah an chiah.

Zeidah An I Cuh Lai?

Kum 38 upa Mayweather nih hin WBC le WBA welterweight title dirhmun sinak a tlaih cuahmah lio a si i, kum 36 upa a simi Pacquiao nih hin WBO welterweight title sinak aa tlaih ve fawn. Hi aa thong ding minthang pahnih nih hin atu an i ken cuahmahmi an sinak kha tutan ah hin an thap veve lai.

Kum 19 Professional boksing aa celh voi 47 chungah sungh mithmai dirhmun a rak tem bak rih lomi Mayweather koko hi a sungh sual ahcun ui a um tuk lai.

Boksing thiam pahnih ahhin ‘Ho deuh dah ropui deuh?” timi hi minung tampi biahalnak a chuakmi cu a si i, cucu thaizing an i thongh tikah a lehnak cu kan hmuh dihte lai. Teinak a comi nih uangthlar taktak in an chan lioah boksing ṭha bik a sinak kong aa chim rel ngam lai i, a sungmi ca bel ahcun an nun damchung ah an philh khawh ti lo dingmi ah a cang ve fawn lai.

Hodah Teitu A Site Hnga?

Boksing thiam pahnih hna hi celhning aa phun dang veve an si. Mayweather nih hin defensive thiam lei hi a minthanpi ngai lioah Pacquiao hi cu attacking game zohnuam taktak a larpimi a si ve. Boksing thiam pahnih hna hi aa ralring taktak dingah zapi nih ruahdamh chung cio an si ruangah hin round 12 tiang an i thong lai tiah ruah a si.

Pacquiao nih ahlan aa thongh tawnning bang attack a tuah len a si si ahcun Mayweather nih mah cu zawnte cu remṭha ah aa rak ngiat ziar lai caah, ‘knock out’ dingah a dirhmun a ṭha deuh temen, Pacman hi voidang aa thongh tawnning loin aa ralrin tuk a si ahcun an i thongh hi a zoh an nuam lo kho temen.

British boksing minthang pahnih Ricky Hatton le Amir Khan pinah, Oscar De La Hoya, Manuel Marquez le Shane Mosley hna nih cun Mayweather nih a tei lai tiah an zumh dih natein, Pacquiao nih tei hram seh tiah an hmaikanh deuh ngai.

Filipino boksing thiam nih a tei lai tiah a zumtu lakah World Heavyweigh champion hlun George Foreman le Mike Tyson an hung cuangkai i, weight division pali ah champion a rak co khotu Miguel Cotto zong nih khan Pacman nih a tei lai tiah a zumhning a si ve.

Hi boksing thonghthiam pahnih an i thongh dih ahhin a teitu dirhmun sinak a cotu paoh nih boksing thongh lentecelh vawleipi hi an chuahtak temen tiah a zumtu an tam ngai.

Phaisa Hmu Bik Boksing Thonghnak

Boksing minthang pahnih hna hi thaizing zarhpini ah an i thongh dih bak cun an ngeihchiah rumnak tam ialte aa chapchuan ṭhan lai. Hi tutan an i thonghnak i an hmuhmi inhin Mayweather nih 60% a tinco lai i, Pacquiao nih 40% in a tinco ve lai. Atu tiang phaisa an hmuh cangmi zat tuaktan in cuaichun ahcun American boksing thiam Mayweather hi dollar million 140-150 karlak in a ngeihchiah a karh lai tinak a si i, Pacquiao nihhin dollar million 90-100 karlak bak in a ngeihchiah a karh vete lai.

Kum 2007 ah Mayweather le Oscar De La Hoya an i thongh ṭum ahkhan Pay-per-view buy in boksing lentecelh vawleicung nih phaisa an hmuh tam bik kum a rak si ve, kha lio ahkhan dollar million 2.5 hrawng an rak ruhmi a si. 

Natein, hi record chingchiah a tlai cuahmahmi hi tutan Mayweather – Pacquiao thongh celhnak nih hin a khuhchilh lai tiah zumh a si. Pay-per-view bak lawng in phaisa a lutmi vialte chungah a tambik kum cu 2013 kha a si i, dollar million 152 an rak huimi a si natein, tutan ahhin Canada, USA le Puerto Rica telawng bak ah dollar million 300 hmuh dingah ruahchan a si.

Mi 16,000 telawng mi a leng kho MGM Grand Arena ah boksing thiam pahnih an i thonghnak hmun gate fee lawng bak an hmuh dingmi dollar million 74 hmanh hi chuahpi a phu hrimhrimmi cu a si hrim ko dah ngai. Gate fee in Record a dir lio cuahmah Mayweather le Saul Alvarez nih kum 2013 ah an rak tlaihmi cu tutan nih a let thum hrawng in a khuhchilh dih lai tinak a si. 

Mizapi zaran caah lehmah hi 1000 telawng zuar a si i, mah hi lehmah hi zuar an otka minute tlawmpal ah an zuar dih manh. Lehmah a zuarzamh chintu website ṭhenkhat ahcun lehmah hi an zuarning man van a tong cang i, a tlawm bik hmanh USD 20,000 (Rs. 13 lakh) hna an hauh! Lehmah 1000 an zuarmi pinah, a tangmi hi celebrities, boxer, promoter le mi cal-lang deuhdeuh pawl caah chiah a si tikah hin MGM Grand ah vawleicung huap milar minthang thang an i pumh lelhlulh ko zongah khuaruahhar tuk awk a si theng lem lai lo dah.

Mirum Pahnih I Thonghnak A Si

Floyd Mayweather Jr.

Boksing thiam minthang pahnih hna hi ngeihchiah chawva ah buaibainak a ngeih veve bak lomi mirum an si. Mayweather nih hin kum 19 chung boksing letecelh vawlei in dollar million 400 bak a thongh khawh tinak a si. Amah hi kum thum chung tiang bak lentecelh vawleicung ah phaisa hmu bik ah a rak dirmi zong a si bal.

Mayweather bangin mirum tuk si hlah hmanhseh, Pacquiao rumnak zong hi a tam taktak ve fawn. Professional boksing a luhhnu ahhin Filipino boksing thiam nih hin dollar million 263 bak a thongh khawh ve cang i, kum 2014 chungah a phaisa hmuhmi dihlak hmanh hi dollar million 41.8 a ti.

Nikum ahkhan lentecelh vawleicungpi chungah hin Mayweather nakin phaisa a hmuh khomi an um lo. Dollar million 105 renglo a hmuhmi a si. Atu tiang a chawrumning zat dihlak hi dollar million 295 a ti tiah an tuaktanning a si. Anih hi ngeihchiah lei aa uangthlar ngaingaimi, mi zapi theih ah pholangh le chim a uar taktak mi a si i, atu ahhin Las Vegas le Miami ahkhin inn ropui taktak zong a ngei hna i, mawṭaw man fakfak a ngeih  rih hna lengah minung 14 a phur khomi private jet zong a ngeih rih fawn.

Dollar million 110 a ngeih tiah an chimphai lengmang tawnmi Pacquiao belte hi cu a ngeihchiah a hmang tuk theng ve lomi a si. A chuahkehnak khua General Santos City ah inn pangai a ngeih i, mah ahcun khuasami a si i, kan hnu ahkhan Beverly Hills ah inn ropui taktak dollar million 12.5 man a cawk ve i, hihi atu naichung hrawngah phaisa a hman biknak ṭum a si.

Harsat Buainak Lakah Mi Thlawhtling

Grand Rapids, Michigan ah a ṭhanglianmi Mayweather hi boksing thonghthiam chungkhar in a ṭhanglianmi a si i, a pa hi thongh chimtu a si. Floyd Sr. hi welterweigh aa thong celh tawnmi zong a si i, a defensive thiam ropui ning aa minthanpi khotu a si ve. A pa unaupa Roger Mayweather hi world champion hlun a si rih. A nu belte tu cu chim awk zeite a um ve lem lo, ritnak sii zun in a uai ngaimi a si i, a ri cercur peng tawn ti a si. Mayweather hi hngakchiate a ti lio a pa he khuachung an lenvahnak ah meithal in rak ṭhuat/ṭaih zong a rak tong balmi a si.

Philippines mizapi nih an uar taktakmi Manny Pacquiao hi cu boksing thiamnak leiah cun hohmanh lawh dingmi a ngei vemi a si lo i, sifak rethei, le harsa chungkhar tein a ṭhanglianmi a si. Mi rethei sifak sang le veng ah khuasa in an rak um i, rawlei ding kawl in a vak chukcho tawn i, aa caan lebang ahcun chunnitlak ti lawng rinh caan zong a rak ngei tawn. Kum 10 a tlin in sianginn kai a pehzulh kho ti lo. Kum 15 a si lioah a pa nih uico a rak zuatmi a rak thahpiak ruangah an inn in a rak chuak bal fawn. Caan zeimawzat chung cu Manila khualipi zalam tlang a remcaannak kip ah a rak riak tawn i, boksing a rak luhka voikhat thongh ah dollar fanghnih (Rs. 127) hna a rak hlawh tawn.

Good vs Evil

American Boksing thonghthiam Mayweather hi anmah ramchung ah aa thong ding si ko hmanhseh, uarṭanhtu a ngeih deuhmi cu Filipino boksing thonghthiam Pacquiao a si. Boksing thiam pahnih hna hi an dirhmun sican aa lawh lo tikah hin Good vs Evil ti tiangin media ṭhenkhat nih an i thongh ding kong hi an ṭial phah.

Boksing thonghthiam pahnih hi an ziaza zong aa lo lo takmi an si. Mayweather hi a ngeihchiah chawva rumning mizapi hmai pholangh le i cua a uar taktakmi asi lioah, Pacquiao belte hi cu mi tangdorte, uarṭanhtu (fan) pawl lawmh a thiam ngaingaimi le Pathian ṭihzahmi a si ve.

MGM Grand, Las Vegas an i thonghnak ding hmun an phanhka hrawng zongah khan Mayweather nih a ceih supmap colhmi zong phaisa kong ṭhiam a si. Minute 40 chung thawngpang latu pawl nih tonbiaruahnak an tuahmi zongah Mayweather nih cun nihnih chungte bak ah dollar million 11 a hmuh kong tehna, mawṭaw man fak taktak, inn lian le ropui lengah private jet tiangin a ngeih kong a chim.

Mayweather nih, “Voikhat thonghnak men hi ka career hrilhfiah dingah cun a tling kho thlu lo. Ka career i ka hlawhtlin le tlin lo a langhter bikmi cu ka phaisa hmuh zat hi a si,” tiah a chim.

Kum 1996 ah professional boxing a luh hnuah voi 47 aa thonghnak ah a sung bal rih lomi Mayweather nihcun, “Phaisa hi record ti ṭukṭak tepawl nakin cun a biapi deuh. Ka fanule hi phaisa ngeih loin cun ka cawm khawh ṭun hna lo,” a ti.

Mayweather hi fa pali a ngei cangmi a si ve i, kum 2011 ahkhan a nungak kut a rak thlak ruangah thla thum chung thong tla dingah rak timi a si natein thong a tlak ahcun Miguel Cotto he an i thongh ding ṭhulh a hau ding a si caah a thong tlak ding caan cu thawnpiak a rak si. Cotto he an i thongh hi ṭhulh rak siseh law, an i thonghnak ding khualipi Las Vegas nih dollar million 100 hrawng a sungh phah ding kha a rak si.

Pacquiao hi a career otka hrawng ahkhan nu komh le phaisa lei kongah buai ngai in a rak ummi asi ve tawn ko nain, kum 2013 ahkhan a rak hrinṭhan. Hi a hrinṭhan hnu a nun nih hin mi a hip ngaingai hna i midang upat a thiammi hi uarṭanhtu (fan) a ngeih chinchinnak lam pakhat zong a si.

(India ahcun May 3^rd 2015 Sunday (zing) 8:30am or 8:00am ah an i thongte lai. TOI)

(Theihternak: A cunglei ca hi vanglaini nifatin thawngcabu (daily newspaper) 02 May chuak kha aa thlakning in hun lehmi asi.)