Angela Merkel: Vawleicung Nu Huham Ngei Thilti Kho Bik

Business thawngcabu minthang le minlar Forbes thawngcabu nih kum 2015 vawleicung nu huham ngei le thilti kho bik an thimmi pawl cu an hun phuanzar ṭhan hui cang. 

Hi an thimmi ahhin German chancellor, Angela Merkel cu vawleicung nu thilti kho bik, pakhatnak a cotu a si.

Merkel hi atu ah hin kum 60 upa cangmi a si natein a thilti khawhnak pawl hi duai khawh lei panh dawhdang in a um hraw rih lo. 

Atu ahhin Germany ram ah a term thumnak in a dir cukmak liopi zong a si rih. Germany ram ah atu amah nih a dirhmun sinak a hun tlaih le rianṭuan hnu hin Germany ram cu Europe ramchung sipuazi (economy) lian le mi hrihhruaitu ah a hung cang phah i, Germany ram cu ram ropui bik sinak dirhmun ah a phakter kan ti khawh fawn. 


Amah hi Leipzig University in Science ah Master degree a lami a si i, hi sianghleirun ṭhiam in hin doctorate a ngahmi zong a si rih. Nikum zongah khan vawleicung nu huham ngei thilti kho bik rak thim lio zongah khan, vawleicung nu huham ngei thilti kho bik panganak ah rak thim a si bal.

Atu bangin vawleicung nu huham ngei thilti kho bik thimnak an tuahning cu thla 12 chungah Media Attention an lakning dan hi tahfung pakhat ah an chiahmi a si. Thawngcabu, TV le Media dangdang pawl nih zeitluk thuk le huap kau khin dah an humzual i an tuaktan hna tbk., hna hi an ngiatthlai hna lengah an Influence le an Inpact hna zong an ngiat hlei fawn rih. Politics, chawlehhrawlnak, ramchung an thil tuahning tepawl pinah zeitluk in dah midang bawmhchanh khawhnak dingah rianhma an lak i an cawlcanghning a si timi tepawl kha a biapi in an ngiat i an zohhlai bik khunmi hna cu a si.

Hillary Clinton hi zeitik caan paoh ahhin nu huham ngei thilti kho bik chungah aa tel kho zungzalmi a si. Atutan zongah hin pahnihnak dirhmun ah a cotu a si kho. Forbes nih kum 2004 in nu huham ngei thilti kho bik thimnak an rak thawk kum in khan tuchun ni tiang ah a min hi a lang kho zungzalmi a si i, duai lei panh lo kan ti khawh ve hnga. Atu ahhin Democrats lei nih US Presidential Candidate caah an i hualmi pakhat dirhmun zongah a dir lio caan a si.

 

Vawleicung Minthang Forbes Thawngcabu

Pathumnak ah Bill Gates a nupi, Melinda Gates a si i, anih hi kum 2000 ahkhan Bill & Melinda Gates Foundation an dirh hnu thawk in khan vawleicung hmun dangdang ah mi bawmhchanhnak rian kha fakpi an rak ṭuanmi a si. Palinak hi Janet Yellen a si i, United States Federal Reserve ah an chairperson a ṭuan lio cuahmahmi a si. General Motors ah an CEO, Mary Barra cu panganak a si. Top 10 ah Michelle Obama cu 10nak ah a hung lang ve. Top 10 in a cunglei pawl hna hi cu a tlangpi in philanthropist, chawletchawhrawl lianngan phu le politician deuh kha an si tlangpi hna.

Entertainment vawleipi ah mi theihhngal a tong minthang langsar , Oprah Winfrey cu 12-nak ah a lang kho ve i, Beyonce cu 21-nak ah a um i, Angelina Jolie cu 54-nak a si. Sofia Vergara cu 57-nak ah a lang kho ve. Taylor Swift, Shakira le Ellen DeGeneres hna zong Top 100-ah an lang kho ve hna.

India ramchung in, State Bank of India ah Chair-Managing Director a ṭuan lio cuahmahmi, Arundhati Bhattacharya cu 30- ah a lang i, nikum ahkhan 36-nak a si. Amah lengah hin ICICI Bank CEO-Managing director Chanda Kochhar cu 35-nak ah, Biocon Ltd ah an founder Kiran Mazumdar-Shaw cu 85-nak ah a lang i, HT Media ah an chairperson Shobhana Bhartia cu 93-nak dirhmun ah a lang kho ve.#