Bill Gates Nih Zei Dah A Ṭihmi A Si?

Bill Gates

Minung paoh nih hin zeimaw thil ṭihmi te khi kan rak ngei cio dih hna i, Bill Gates zong nih hin ṭihmi zeimaw te cu a rak ngei ve ko. 

Asinain Bill Gates nih hin mah bantuk Phobia lei thil ṭih leikap si loin, vawleicung pumpihuap in a tlung/chuak dingah a duh lomi, tlung sual seh law tiah a ṭihphannak kong a chimmi kha a si.

Vox nih tonbiaruahnak an tuah ah, Bill Gates nih minung hna kan cungah a rung tlung sual lai tiah a ṭihmi kong kha a chim. “Nuclear raldohnak hi cu ka nunnak ah ṭihphannak ka ngeihmi a si theng lo, cupinah hi i dohnak a chuah khawhnak ding a lam hi a tlawm tuk ti hi ka hmuhning a si,” a ti. Nuclear raldohnak a chuak sual lai timi hi minung tampi nih tuksapi in ṭihphang thather in an um len lioah anih nih cun cu bantuk thil cu a ṭih thengmi a si ve lo.

Bill Gates nih a ṭih bikmi belte cu vawleicung ahhin zawtnak rai ṭihnung a tlung sual lai ti kha a phan i, a ṭih bik cemmi cu a si.

“Kan hmailei nun lamtluan kan zawh cuahmahmi ahhin zawtnak rai ṭihnung a chuak kho le a tong kho kan si hna i, Ebola nakin ṭihnung le thih a ol deuhmi zawtnak rai phun hi vawleicung pumpuluk ahhin a chuak pingpang sual lai timi hi ka ṭihphan tukmi cu a si,” a ti. 

Vawleicung huap zawtnak rai a leng hmanung bik cu Vawlei Ralpi I-nak dih hnuah a rak chuakmi Influenza zawtnak rai kha a si i, hi rai nih vawleipi a rak tlunh ruangah vawleicung huap in minung Million 20-40 karlak hrawng an nunnak a rak liam bal.

“Atu kan chan ahhin ahlan chan nakin khan vawlei cungah zawtnak rai tlunh le karhning hi a hung olzang deuh cang i, a rang taktak fawn. Zeica’htiah cun kha lio caan Influenza zawtnak rai a rak tlun lio vawlei kan i tlawhkaining, pehtlaihning le cawhning nakin a let 50 in kan san deuh ruangah a si,” a ti.

Bill Gates nihcun kha bantuk zawtnak rai kha tuchan ahhin hung tlung ṭhan sual sehlaw, ni 250 chung bak ah million 33 lengkai nih kan thihpi phah men lai dah, tiah a ti.#