Asia Ram Ah A Lian Bik Ding Vailamtah Tung Pakistan Ram Ah An Tuah

Pakistan ram, Karachi khualipi ah Asia ramchung ah a lian bik a si dingmi Vailamtah tung cu an tuah cuahmah lio a si. 

Hi Vailamtah hi pe 140 a sang lai i, meithal hlanh khawh lo dingin tuahmi a si. An tuahnak pawl ah an hmanmi cu kahpa thir (steel), thir (iron) le cement pawl an si.

Atu Vailamtah tung a tuahtu hi Khrihfami, sipuazi a tuah tawnmi, Parvez Henry Gill a si i, Gora Qabristan timi Pakistan ram Khrihfa pawl phumnak thlanmual hmun ah a tuahpiakmi hna a si. 


Gill nih, Muslim ram ah a ummi Khrihfami hna caah Pathian nih zeimaw thil pakhatkhat tuah dingin a kalciami kum li lioah khan langhnak a rak ka pek i, tutan ah Asia ramchung Vailamtah lian bik tuah dingah kaa timhtuahmi hi a si, a ti.

Gill nih tutan vailamtah tung tuahmi hi a dirnak hmun vawlei tang hi pe 20 tiang thuk in cawh a si tiah a chim. Cun hihi meithal kuanfang pawl nih hlanh khawh lo ding zong in thuam a si rih fawn i, hrawkhral duhnak thinlung a pumi an um zongah olzaang in hrawhhral khawh a si lai lo, a ti. 

Gill nih Vailamtah cu Pathian hmelchunnak hmuhsaktu a si i, hi Vailamtah a zohtu paoh nihcun thinlung zawtnak le thadit zaangbatnak le zaangramnak an ngeihmi vialte hna kha zaangdamnak a pekchanh hna lai, a ti.

Karachi khualipi ahhin minung million 21 an um i, hi chungah hin million pakhat hrawng hi cu Khrihfami an si ve. Pakistan ram hi an milurel zatuak 90% hi cu Muslim biaknak a zulmi lawngte an si hna.#