India Cozah Nih Maggi Khohsuai Dothlatnak Tuah An Pehzulh Peng

Maggi Noodle khohsuai cu minung takpum himnak caah a ṭhalo tiah sualphawt a si ruangah acozah nih dothlatnak pehzulh tein tuah ding tiah a ti. 

India ramchung, ramkulh (state) hmunzakip ah Maggi khohsuai an phawtzamhmi vialte cu hneksaknak asiloah dothlatnak ṭha tein a tuah lai kong le, thil dikhmaan lomi hmuhchuah a si ahcun Maggi khohsuai a serchuaktu kampani cungah dantatnak faklak in pek an timh kong an chim.

Atu cheknak hi Central Food Safety Regulator FSSAI (Food Safety and Standard Authority of India) nih a tuah lio cuahmahpi a si i, hihi nithum hnuah ripawt an chuah khawh lai tiah ruahchannak ngeih a si.

Uttar Pradesh ramkulh, Food Regulator FDSA nih minung taksa ngandamnak caah a him ding tawk ah ruahmi leng a luan tiah, Barabanki Court biaceih zungah taza an cuai hna i, hi khohsuai a faktu lemcangtu (actor) Amitabh Bachchan, Madhuri Dixit le Preity Zinta tepawl hna zong biaceih zungah tazacuai an si ve lai.

Food and Consumer Affairs Minister Ram Vilas Paswan nih, “Maggi khohsuai kong he pehtlai in information kan lak cuahmah liopi a si rih i, UP Food Department zung lei nih cun an hneksak tikah aphi an hmuhchuahmi cu Monosodium Glutamate (MSG) suan (lead) an hmuhchuah i, hi kong hi FSSAI nih pehtlai tein dothlat cheknak a tuah ve lio cuahmah a si,” a ti.

Kerala State Civil Supplies Corporation (Supplyco) nih Maggi Noodles hi minung ei dingah ṭihnung a si tiah an hmuhchuah ve cang ruangah an ramkulh (state) chung pumpuluk ah Maggi khohsuai zuar an khap cang i, Food and Civil Supplies Minister Anoop Jacob nih Civil Supplies Corporation pawl hna cu Maggi Khohsuai zuar ti lo dingin theihternak thawng a thanh cang hna.

Delhi state chung zongah hneksaknak (lab test) an tuah ve tikah Maggi cu minung ei dingah ṭihnung a si timi aphi an hmuhchuah ve i, minung kan ngandamnak caah a himlo ruangah Delhi acozah nih cun a serchuaktu kampani Nestle India cungah dantatnak lak siseh tiah an ti.

Atu hi India ramkulh kip ah Maggi cheknak an tuah i, cu aphi ripawt cu an hngah liopi zong a si.

Maggi a ei lengmangmi nih rak i sum cio hna usih. A hlei khun in a ei in ei tilo ahkhan kan taksa pum ngandamnak caah a him bik dingmi cu a si ko.#