Australia Ah Lemcangtu Depp Thong Thlak Aa Huah Kho Men

Johnny Depp le A uico Pahnih

Zawtnak an kai le kai lo kha nawlngeitu pawl nih felfai tein chek-nak an tuah dih hna hnu lawnglawng ah saṭil le saram phun pawl hi an ram chungah luh khawhnak nawl pek an si tawn. 

Johnny Depp nih hin nawlngeitu nawl onhnak tel loin a uico pahnih cu Australia ram chungah aa luhpi hna ruangah kum 10 tiang thong thlak khawhnak ahmuh in tazacuai i tandatnak pek khawh a si.

Atu ahhin lemcangtu (actress) Johnny Depp hi Australia ram ah Pirates of the Caribbean timi movi an i thlak/can lio cuahmah a si. Atu film an i thlaknak hmunhma ahhin umcilh ve a hauh ruangah a uico pahnih a hruainak hna hi a si. 

Atu bantuk in a uico pahnih nawlngeitu hna theihpinak le hnatlakpinak la hmasa loin a luhpimi ruangah hin Australia ram nawlngeitu pawl thin a phawh ngaingai hna.

Johnny Depp le Thaisung Amber Heard

Australia ram Agriculture Minister, Barnaby Joyce nih Johnny Depp le thaisungnu, Amber Heard hna sinah nan uico pahnih an rung i hruaimi cu kirter ṭhan zokzok u tiah theihternak thawng a thanh hna hnuah an uico pahnih cu a khirh ṭhan cang hna. Natein saṭil le saram pawl paohpaoh Australia ramchung ah luhpi khawhnak phunghram an buar ruangah dantatnak belte cu a huah ding hrimhrim lai, a luat kho ah ruah an si lo.

Hi atu bantuk in ram nawlngeitu hna onhnak tel loin Australia ramchung ah saṭil le saram luhpi sual ahcun kum 10 chung thong tlak le dollar 250,000 tiang cawiliamter khawh an si.#