SKorea Ah MERS Virus Ruangah Mi 2 Nunnak Liam Cang

Middle East ah zawtnak rai a tlungmi, Middle East Respiratory Syndrome (MERS) ruangah minung tampi cu an nunnak a liam cang. 

South Korea ram zongah minung 25 nih hi zawtnak rai a kaimi an um tiah fiang tein an theih cang hna lengah, lunghrinh mi 680 cu hmunhma adang tein zohkhenh dingah umter an si hna.

Ministry of Health and Welfare official, Kwon Jun-wook nihcun hi zawtnak rai nih a tlunh cangmi minung 25 chungah pahnih putar kum 71 mi le nu upa puitling kum 58 nih an thihpi cang tiah a chim.

China ram zongah hi zawtnak rai a ngeimi minung pakhat an hmuhchuah cang ti zong a si rih.

MERS zawtnak rai hi kum 2012 April thla ahkhan rak hmuhchuah cangmi a si i, hi zawtnak hi Saudi Arabia ram in a hun karcho chin vimami a si. Hi zawtnak nih a tlunhmi hna minung cu cumpit pangai khin a hung um hmasa bik i, a hnuah an khuasik, thawhchuah le thawdawp lei harsatnak an ngei lengah pneumonia le kal ṭhatlo i rawknak tiangin a chuahter khotu a si. 

Hi zawtnak rai hi minung tivun in a hung chuakmi phun pawl in a karh khomi a si. Kum 2003 lioah Asia ramchung ah minung tampi thihnak tiang a tluntertu Severe Acute Respiratory Sydrome (SARS) nakin ṭihnung deuhmi zawtnak a si tiah an chim.

Kalauk in Minung ah....

Vawleicung pumpuluk chungah hi zawtnak rai MERS a ngei/kai cangmi hi mi 1,167 an um cang tiah theih a si i, hi chungah hin minung 497 nih an thihpi fawn cang tiah European Center for Disease Prevention and Control phu pawl hna nih cun an chim. 

Hi zawtnak rai a tlungmi vennak le zohkhenhnak (vaccine) sii-ai hi an hmuhchuah khawh rih lo ruangah, hi zawtnak in a zawmi chungah zatuak 41% hna nihcun an i thihpi cang. 

Hi MERS zawtnak rai hi kalauk (camel) saram phun in a chuak i, minung ah a tlung chinmi rai a si tiah an chim. Saudi Arabia ram Health Official nih cun an ramchung ah kalauk (camel) a ummi chungah zatuak 90% cu hi zawtnak rai an ngeimi a si tiah an chim.#