Delhi Universy in Political Science A Dihmi Salai Sang Hnin Lian He Ton Biaruahnak

Salai Sang Hnin Lian

Min: Sang Hnin Lian            

Chuah kum, ni le thla: 1 July 1989    

Nule Pa min: Pi Biak Hnem (Tleicia, Cinkhua) le Pu Chan Zam (Dongva)        

Chuahnak Khua: Hakha

Unau: Chuakkhat pa 4 le half-sister pa 2   

Huamsazawng : Pumpalulh chuih le upat hnu in Carel     

Bu min (Denomination): Baptist                   

Cawnnak limmi: B.Sc. (Burma), le B.A., (Hons.) Political Science (India)           

Phun min: Khupchon

Editor: Atu ah Political science in Degree a la ti thawng kan theih, zeitik kum in dah na rak i ot, cun kum zeizat dah nan cawn i, zeitindah Delhi University ah na rak luh khawh ning a si tawifiang tein kan chim kho law kan i lawm ko hnga?

Salai Sang Hnin Lian (SH Lian): Aw, a si. June 2013 ahkhan Pathian lamhruainak thawng in B.A., (Hons.) Political Science cu ka lim. Degree belte hi cu kum khat le cheu hnu ah pek a si tawn.  June 2010 in ka thawk i, kum thum chung ka cawng. Delhi University ka luh khawh nakding ahhin Plato Van Rung Mang (CHRO Delhi Office) ah Coordinator a rak ṭuanmi nih khan ruahnak a ka pek i, Chin Students’ Union (CSU), Delhi bawmhnak le tolrelpinak, a bik in 2010 CSU president Salai Laitha nih tlangtlaknak in ka rak luh khawhnak a si.  

Editor: Kawlram ah siseh, cun India ram ah sianginn na kainak kong tawifiang tein na kan chim kho hnga maw?

(SH Lian): Kawlram Bupi chungah khualipi pakhat a simi Hakha ah 1994 ah Dawrthar Primary School ah tangcheu in ka thawk i, July 2005 ah No. 1 BEHS, Hakha in tang hra ka awng. Cu kum ṭhiamṭhiam, December 2005 ah cun B.Sc., Mathematics kha specialize in Kalay University ah cawn hram ka thawk ṭhan, September 2008 ah tlamtlingte in kai lim kho. Cun, 1 March 2009 ah Degree letin tlamtling tein ka lak. Cu kum 2009 thiam ahcun India ram ah sianginn kai peh duh ah ka ra. June 2009 ah Bangalore ka rak phan. A ruang tampi ruang (a bikin tangka) ah lungduhnak hmun sianginn ah ka rak lut kho lo i, Calvin Theological College & Seminary (CTCS) ah kumkhat BD program ka rak cawng. Pathian thawng in tlamltingte in ka dih. Sianginn ka dih le cangka in cu CTCS le Korean International Mission timi nih an ngeihmi Children Development Program, Bangalore ah Computer chimtu rian thla thum chung ka ṭuan hnu ah Delhi University sianginn luh a zaat cang ruangah rian chuahtak in sianginn kai peh dingah Delhi lei ahcun ka rak ra. Cun, June 2010 ah Kirori Mal College, University of Delhi ah ka lut i, June 2013 ah Pathian lamhruainak thawng in tlamtlingte in kaa lim. Cucu, kan ram le India ram ah sianginn ka kainak kong cu a si.

Editor: India ram sianginn na kainak ah a harsa na timi le nuam na timi hna teh chim awk a ṭhat ahcun theih kan duh ngai ko?

(SH Lian): India ram sianginn ka kainak ah a harsa ka timi hi a tam ngaingai ko i, a nuam ka timi zong hi a tlawm cu a si ve lem lo. Asinain, ka chim dih ahcun a tam tuk lai caah, pakhat hnihte von chimning law; kum khatnak sianginn luhka i, holhthiam lo, cathiam lo, Sayate nih cachimhmi zulh le dawi khawh lo kha a harbik ko lai dah! A nuam ka timi caan hi kum hnihnak a donghlei in kum thumnak ka thawkka hrawng hi a si. Kum hnihnak ah Pathian thawng in result ṭha ngai in ka awng. Cunih cun, sayate he pehtlaihnak a daanter colh. Sayate nih chawnhbiak ningdaan a dang. Cu lawng si loin, kum thumnak ka phanh hnu ah ka nuamh ngaimi le ka lunghmuih ngaimi pakhatte a um rih. Cucu, Tlangcungmi pawl tonpumhnak (Conference) Thailand ka kal kar ah, North Eastern-cum- Foreign Students Union, Kirori Mal College, DU nih Meritorious Award 2012 a kan pek. Cucu, kum hnihnak ka awnnak lawmhpinak kha a si. Mah cu bantuk thil fate zong nihcun a rak ka lawmhter ngai ve ko. A dangdang harsa mi le lawmhnak zong cu um len ko nain mah vial hi si ko seh!

Editor: DU sianghleirun sianghnakchia pawl an i hruikawi ning le an kalning theihhngalh awkyha na timi thlawmpal in na kan chim kho hnga maw? Cun kan ram lei sianghleirun sianghngakchia pawl kan i hruaining he an i dannak na timi tete hna teh a um maw?

(SH Lian): Delhi Sianghleiruun Sianghngakchia Buu, Delhi University Students Union (DUSU) cawlcanghnak hi, sianginn ka kai chungah ka khuaruahhar ngaimi pakhat ah a tel ve mi thil a si. An cawlcanghnak ah thilyha lo tampi zong a um len ve ko lai nain keimah nih ka hmuh khawh tawk in a ṭha deuh ka timi vun chim ka zuam lai. DUSU hi kum khat ah voikhat thimnak an tuah. Cu thimnak ahcun Siangngakchia Bu (Party) pawl hi anmah hmuitinh cio in an i zuam. A bik in Party ngan pahnih an um. Pakhatnak ah, tulio India Cozah tlaitu a simi Congress Party nih a dirpi mi National Student Union of India (NSUI) le India ram cozah ralkah in dotu (opposition) party a simi BJP nih a dirkamh mi ABVP hna hi an si. A dangdang Communist idea deuh a tlaihmi Student Federation of India (SFI) tibantukin Bu phundang deuh zong in an i zuam cio. 

Hi DUSU thimnak a um cang lai ti a si ahcun Delhi chung i thanhca ahhin cun rel cawk loin an ṭial tawn. Cu nih a langhtermi cu, DUSU hi zeitluk in dah a biapimi a si ti kha a hmuh saknak a si. DUSU in hin India ram politics mino level in cun a thawknak hmunhma biapit taknak hmun a si kan ti khawh. A bikin Delhi caah a si khun. Delhi ah Party pahnih lawng an um. PJP le Congress (tukum ceo in AAP a dir) an si i, Cubantuk cun DUSU zuamnak zong ahcun Partyy ngan pahnih Congress nih dirkamhmi NSUI le PJP nih dirkamhmi ABVP cu a si ko. Cun, DUSU ahhin a zeibantuk Party hmanh si law, President asiloah, Secretary na tlin phot ahcun India rampi Parliament chung luhnak ticket na ngaih cang he khin a khatmi a si. A tuan le a tlai lawng a si ko cang. Cu DUSU Election cu phungningte in Campaign tuah caan, vote thlak caan tiah ṭhen dih a si ve. Cu DUSU Thimnak cu Sianginn kharpiak in siangngakchia vialte nih Vote thlak cio a si. DUSU cawlcanghnak cu a ropui ngaingai ko.

Kannih Kawlram sianghleiruun Bu kan i hruai daan he cun Van le Vawlei in a dang ko. India ram cu Democratic ram a nganbik pakhat a si lawng si loin a caan zong a sau ngai ve cang mi a si caah Mino le Siangngakchia nih an covo an i fiang ngaingai. Cu nihcun, cawlcanghnak thazaang a pek tuk hna i, a ṭhawnter tuk fawn hna. A hlanlio kan pa le nih an chim tawnmi yangon University Students Union (yUSU) he khan a lo pah men lai tiah ka ruah. Mandalay, Monywa le Kalay hrawnghrang he cun tahchun awk hrim a ṭha ve hnga lo. A bu in umnak nawl hrimhrim a rak kan pek duhlonak nih khan tam tuk a rak kan hrawh cang. Sianghngakchia nih a bu in kan ngaihmi covo hrimhrim kha kan rak i thei lo ti ka lawhter. Delhi University Administration ahhin thil hmete in a nganpi tiang ah DUSU nih a lungtlinpinak le telpinak a hau yheo tawn. Kan ram sianghleiruun bu he cun a dang riamruam ko hen ta…! Asinain, Cozah tha lo nih a sau tuk a rak kan reh cang caah a si i, duhsah huamsam tein cawlcanghnak a tha thluahmah vete ko lai tiah ka ruah ko.

Editor: Kan ram cacawn ning le India cacawn ning ai dannak na timi tete a um maw? Na kan chimh khawh cun kan i lawm tuk hnga?

(SH Lian): Hihi midang zong nih a kan hal ṭheo tawnmi a si. Kan ram le India cacawn ning a dannak khi cu a tam liangluang ko. Sianghleiruun chung ah rak luhning daanphung an tuahmi hrimhrim khi a dang tuk cang. Kawlram Bupi ahcun Hakha in tanghra a awngmi na si ahcun na duh zong duh lo zong ah, Kalay, Monywa le Pakhuko University hrawnghrang ah i zit na hau. Asinain, India ram Sianghleiruun luhning daan cu a si ve lo. India ram khuazeika hmun hmanh i a awngmi pa/nu na si ahcun, nangmah le na duhnakte ah va kal in va sok khawh dih an si. Cun, a hlei in Central University hna lebang ahcun State tinkip caah ṭhutnak (reserve) an chiahpiak cia fawn hna. Asinain, kannih ram ahcun yangon ah kai ka duh ko na ti len zongah fawite in a ngahmi a si lo. Cucu hau, khakha hau, chungkhat um hau ti phun a tam tuk. Cu lak ah, Delhi University ahcun Delhi khua chung a ummi na si lo zongah siseh, na awnnak mark a ṭhat deuh paoh ahcun asawng (hostel) ah um dih a si. Hmun dang le khua dang in a rami caah cun Hostel ngah a si.Cucu a dan khunnak cu a si.

Ka bia tamtuk ka vun pial sual, Cacawn ning zongah a rak i dang tuk ṭhiamṭhiam. Kalay University hrawng kaimi he cun tahchun awk a ṭha lo. yangon ah cun ka kai bal ve lo caah ka hngal ve lo. Kalay University ahcun Sianginn nih an kan pekmi Text Book leng in cun rel awk le hmuh awk hmanh kan ngei lo. Sayate nih kan kaa chung tiang an kan kheih. An kan rawnpiak i, kannih cu a dolh ceo in kan dolh. Kahin cun a si ve ti lo. Siangnakchia nih biatak thlak in teirial a hau. Mahnih zuamnak chuah a hau. Kawlram i by-heart system kha a ngah ti lo. Mahte in theih khawh nakding caah kawl chih a hau cang. Professor-te cu lamchimtu le sialpiaktu kha an si. Cucu, a dannak cu a si ko. 

Editor: CSU (Chin students’ Union) president a ṭuan ti thawng kan theih zeitin dah CSU nan i hruaining a si i, zeidah hi buu nih hin ai tinhbikmi a si? Cun zeitik kum le caan hna in dah rak otmi a si? CSU a dirka in 2013 tiang haotu (president) aho hodah nan si?

(SH Lian): Si! CSU Delhi ah 2012-2013 cacawn kum caah President ka ṭuan. CSU hruaining tiah cun vun hrilhfianh ding a tam ngai. A tawinak in ka vun i zuam lai. CSU ahhin Executive Committee minung 9 kan um. Cu chung in Central Executive Committee minung 5 kan um i Auditor hi a dangte in kan ngeih rih. Culawng si loin, Advisory Board tiah kan ngeih rih i, a tlawmbik minung 5 an si tawn. Atunai kan chimmi, CEC minung 5 hi biatakte in CSU cawlcanghnak ah rianṭuanmi cu kan si.

CSU Delhi hi tinhmi ngei bu tein 1st Oct 1995, dirhmi a si i, tinhmi hna lak ah a biapi deuhmi pa 4 hi ka vun chim duh. 1. Chinram le Kawlram Bupi chung ah a fekmi Chin Students’ Union dirh khawh ṭhannak 2. Chin miphun nih harsatnak kan tonmi ah sikhawh chung in bawmh le a hlei khun Sianginn kainak lei kap ah thazaang pek le harsatnak a tongmi hna bawmh chanhnak, 3, Kan Holh le Ca, Nunphung hna zokhenh le cawisannak, 4. Kan ram dirhtu a si ve mi tlangcung midang hna he bawm in kan ram ah Democracy, Human Right le Self-determination kan ngah khawh nakding ah si khawh chungin ṭuannak hna hi an si.

Kumpi kum 18 a si cangmi hruaitu upa pawl min vialte a hlei in haotu thengtheng chim ding cu an tam tuk lai i a harpah lai caah, ka lung i a vun chuakmi vialtu ka vun in chimh lai, Laitha, Aung Myin Myint. Lalremsanga, Plato Van Rung Mang, Van Bei (K’chhi), Salai Thla Hei, Salai Denial Sakhong, Za Ceu Lian, Salai Van Dawt Ceu, Salai Elaisa Vahnei hna, a dang tampi an um len rih.

Editor: CSU president na ṭuan chung nan cawlcanghnak ah harsatnak na tonmi a um el maw?

(SH Lian): Keimah pumpak in cun harsatnak ka tonmi cu a um lem lo. Amah bel kan zapi in kan tonmi cu, CSU Delhi cu Chin huap taktak mi bu a si tikah member chungah Kawlram ṭhangmi an um, Laitlang ṭhangmi an um, Mizoram ṭhangmi zong an um i meeting tik ah, holh hna khi kan i harh chel a um pah ṭheo. Asinain, harsatnak cu a si in ka hngal lo. A tlamtling ṭhiamṭhiam ko. Amah bel, Chin Communities Delhi pawl nih hin lungduh tluk in an kan theihthiam lo caah le CSU nih mizapi caah kan si khawh chung in kan i zuam lio i, mizapi nih zeihmanh theihthiampiaknak le duhnak an rak ngaih lo caan khi kan harsat caan pakhat cu a si ko ka ti. 

Editor: Delhi na um chungah Laimi kan ṭhutto ning le cawlcangh ning zeitindah na hmuh. Cun kan i remh a herh ko tiah na ruahmi pawl teh a um maw? 

(SH Lian): A ṭhami tete zong a um liangluang ve ko i, a ṭhalomi zong cu a um len ve ko. Kan i remh a hau ka timi cu, Tlangval pawl nih nikhua caan le hmunhma ruat loin din le ei kan hman pengmi hi ka uar lo ngai. Cun, kan far le pawl nih a hmunhma ruah theng lem ve lo i, zoh duhnung lomi thil hruk, fenh-aih an hmanhmi hi a hmunhma zoh in kan i remh a hau ka ti.

Editor: Delhi um Chinmi hna nih Delhi kan um chungah zeilei ahhin dah thazaang kan chuah awk deuh a si tiah na ruah?

(SH Lian): Delhi um Chinmi hna hi kan rat hnawhchan a dang cio in ka thei. Nain zatuak 80% tluk hi cu ramdang lanh hi rat hnawh bik a si. A dang zatuak 12% hi cu Sianginn kai le fimnak cawn ah ra kan si lai tiah ka ruah damh i; cun, a dang 8% hi cu a vaivun sawsawh mi le pumpak herhhai sawhsawh ah a rami kan si men lai. A biapi bikmi cu pumpak pakhat cio nih kan rat hnawhmi tlamtlin cio kha a biapi bikmi a si ko. Nain ka lung a nuam lo ngaimi cu zatuak 80% chung i mino le hngakchia pawl caah ahhin a si. Mino nih zeihmanh rianṭuan zong ngei lem lo, cawnmi zong um fawn lo, inn ah um sawhsawh bak in ramthumnak lanh an hngahmi hi ka lung ṭha lo ngai. Cucaah Mino le hngakchia poah nih hin cun cawnnak lei ahhin thazaang chuah deuh cio hna usih ti hi ka duhmi a si. Hi kong he pehtlai in thazaang peknak capar tete zong tampi ka ṭial. Cu hna lak i pakhat cu “A Hramte In Thok I Tim Ko Usih” timi a si. Cu chung ahcun cawnnak a biapit zia kha ka langhter i, zeitindah sianginn kan luh khawh lai timi zong kha ka rak langhter chih fawn. Cucaah, zatuak 80% chung i a tambik a simi mino le hngakchia hna nih hin sianginn kai cawnnak hi biatakte in thazaang chuah hna usih timi ka ruah zungzalmi le ka thazaang peknak a si. 

Editor: Laimi phun hi ramchung ah siseh, kan phaknak kip ah Khrihfabu le vawlei lei tin i ṭhencheu lengmang kan hman hi zeitin dah na hmuhning a si?

(SH Lian): Lai miphun hi ṭhencheu cu kan uar ngaingai. An chim ṭheo tawn bang zeibantuk thil le tuahsernak hmanh nih hin a ṭha lei le a chia lei in a um dih ko an ti. Ṭhencheu hi a poi lo a timi mi cheukhat hna nih kan i ṭhencheu ruangah mah le tawk zawn cio in hruaitu tampi kan chuak tiah an ti. Asinain, keimah pumpak hmuhning cun ṭhencheu cu a ṭha lo ka ti ko. Biaknak lei i kan i ṭhen tukmi hi cu ka uar lo ngai. Kan i ṭhenning zongah Baptist min veve ṭhiam hna kan si ko fawn. Biaknak lei kan i ṭhencheu tukmi hi cu Baibal Sianginn a kaimi kan tam tukmi nih hin a chuakpimi siseh law a dawh ngai. Cun, Vawlei lei in kan i ṭhencheumi hi cu, an kan uktu nih Divide and Rule Policy an hmannak nih direct in a chuahpi i, kan thi chung ah a lut cangmi khi a si ka ti. Kan i ṭhencheu deuh poahpoah le uk le pen kan fawi deuh ko lai. A ṭha lo ngaingai mi a si. A ruang cu United We Stand, Divided We Fall ti pei maw a si kha!

Editor: Kan ramchung ah tlangcungmi pawl hna nih kan duhmi federal state cio hi kan hmuh khawh lai tiah na ruat maw?

(SH Lian): Ka hmuh khawh lai tiah ruahchannak nganpi ka ngei ko. A tuan le a tlai lawng a si ko lai ka ti. Naite Tlangcungmi Hriamtlai Phu 16 le Kawlram Bupi Cozah nih dirhmi MPC rianṭuantu bu tonnak an ngaihnak zongah khan lungtlinnak cu an ngei kho ko kha. Federal ralkap kan dirh chih a hau timi biatung kha um hlah seh law cu tluangte in bia an ceih khawh ko hnga. Atu ahcun, Ne Win le Than Shwe nih an thluak an ṭawlcia cangmi hna ralkap bawi an tam tuk rih caah fawi le bai ah an i fiang kho rih lo i a si. A hlan ahcun Federal timi biafang hmanh an hngal kho lo pi. Atu cu ahcun Federal tiah an chim ngai ve ko cang hi! A ṭha pahte ko lai dahkaw….Asinain, a biapimi cu kanmah a pumpak cio zong nih Federal ee, Democracy ee kan ti lengmang mi hi zeidah a si ti hi kan i fian ngaingai a haumi le a herhmi cu si ko. Kan chim lengmang ahcun chim ding tam tuk lai. 

Editor: A ralaimi kan ram 2015 thimnak hi zeitin dah na cuanhning a si?

(SH Lian): A ralaimi 2015 thimnak cu a luanciami 2010 thimnak le lakhruak 2012 thimnak nakin cun a dikfel deuhte lai tiah keimah pumpak ka ruahning cu a si. A ruang cu, kan ram zong a ṭhat lei a panh ziahmah deuh caah, ramchung le ramleng in ngiathlaitu tete zong duh poah in an lutchuak kho cang i, kan hruaitu pawl zong an i ralring deuh ngaingai cang lai. Thimnak phungpi hi PR system ah an thlen lo a si ahcun 2015 thimnak hi ruahning bantuk nakin adang deuh in thil a cang kho te men. A tulio cozah tlaitu USDP le Pi Suu nih hruaimi NLD hi a tum tlang cu an site ko lai va sikaw an i kingkhang pahte kho men. 2012 lakhruak thimnak zoh ah mizapi nih NLD an tanhnak kha a lang ngaingai i; Kum 2015 hna ahhin ahohmanh nih majority vote ngah loin, acozah dirh khawh loin Coalition Government (fonhchom cozah) hna zong dik a chuah phahte. Asiloah, a tulio i an tuah cuahmah mi Peace Process (remdeihnak lamthluan) pi nih dik a va thlen chih dihte. Vun ruahdam awk a har ngaingai! A fiangmi cu 2015 thimnak cu 2010 le 2012 nakin cun a thianghlim deuh lai, a dikfel deuh lai, cucu a si. Nain, cu nakin a biapi deuhmi cu; zeitindah 2008 Phunghrampi hi kan remh lai timi biahalnak tu hi a si deuh ti’n ka ruah. Na ka hal duhmi hna ka kheng dik maw?

Editor: Chin miphun hi tlangholh (common langue) le zungca (official langue) kan ngei kho lai tiah na ruat maw?

(SH Lian): Kan ngei kho lai tiah ka ruah ko. Asinain, atu bantuk a si ahcun caan bel a rau kho men.

Editor: Delhi khuatlang a ummi mitam deuh hi cu a tlangpi in ramdang ah thil kuat in aa cawmmi kan tam ngaingaite ti cu chim hau loin na hngalh. Mah hi zawn ahhin sahdah, sikhar, khaini, tbk., pawl kuat kan hmanmi hi zeitin dah na ruah ve ning le hmuhning a si aw...?

(SH Lian): Leh dingah ka von i harh ngaingai. Hihi cu midang pawcawmnak a si i comment pek lem lo ka duh deuh. A ruang cu hihi thil a kuami tampi hi ka hal tik hna ah an kuat duh tuk ruang le a hleihluat in phaisa hmuh an duh ruangah a si lem loin ka hmuh. Nitin pawcawmnak caah an kawlhawlnak a si i, a ṭha ṭhalo ti cu vun chim a har ngaingai. A ṭhat le ṭhat lo cu mizapi kan hngalh dihmi a si ko cu ta! 

Editor: Delhi chin miphun biaknak lei siseh, vawlei lei zong siseh an i hruaining he pehtlai in nangmah na hmuhning, cun hihi cu kan i remh deuh ah a ṭha ko lo hme maw na timi hna teh a um maw?

(SH Lian): Hihi cu chim ding tampi ka ngei lem lo. A hlei in Biaknak lei hi cu chim ding um lem in ka thei lo. Asinain, Delhi ah Chin Mipi nih rathnawh mi tlamtling khawh nakding caah ahcun CRC hi ṭhawnter deuh a hau ka ti. CRC le Community a thawn khawh nakding ahcun pumpak kha a biapi bik a si. CRC, Community  le Mizapi karlak pehtlaihnak a ṭhat deuh a hau ka ti. Tc. Vun la ning law, CRC le Community zung kal hna khi mipi nih tih ngai le zenh ngaimi a si ahcun a ṭha lo ngaimi thil a si hnga. Cun, a biapimi cu hruaitu nih mipi bawmh khawh i zuam peng le mizapi nih hruaitu hna theihthiam peng kha a si. 

Editor: Ṭhangthar mino cacawng liomi hna nih a hleihluat deuh in ṭha kan pek awk le kan i zuam awk a si tiah na timi?

(SH Lian): Cawnnak hi cu zeibantuk a si hmanh ah a ṭha ko tiah ka ruah ko. Cu thengtheng, kha thengtheng, Science theng, Art theng siloah sibawi theng, Engineer theng nan cawn awk a si, kan cawn awk a si timi cu ka ngei lem lo. Mino cacawngtu pumpak nih a lung a thleh i pumpak nih duhmi kan cawn kha a biapi deuh mi a si. A biapi bikmi cu zeibantuk kan cawn hmanh ah kan thiam dingtu kha a biapi deuh mi a si. Kan cawnmi ah thiamhleisang si khawh khi a ṭha ka ti. keimah pumpak zong ka zuam cuahmah liopi a si ve.

Editor: Nan lamtluan kalnak caah tlaihtleng (motto) a um maw?

(SH Lian): Ka lamtluan kalnak caah tlaihtleng (motto) ti thengtheng cu a si lem lai lo nain ka hngakchiat liote in kan innpi chung ah an rak kan tar piakmi Baibal ca caang Matthai 7:12 ‘Minih ka cungah tuah hna seh ti na duh bantukin midang cungah va tuah ve’ timi hi a si. Zeibantuk thil ka tuah lai poah ah hihi a hun mang ṭheo tawn.

Editor: Atu lio kan ram dirhmun he pehpar in Chin miphun hna nih kan herh tiah na ruahmi a um el maw?

(SH Lian): A um liangluang henta, asinain tampi cu ka chim ti lai lo. Pakhatte kan theih le hngalh a herh ngai tiah ka ruahmi cu, Chin miphun nih hin Party Politics ah hin kan pil sual rihlo nakding a biapi ka ti. Kannih Chin miphun hna caah kan National Politics tu hi hmai ah kan vun chiah ta rih ding a si. Kan Chinram caah kan duhmi, kanmah tein khuakhaan lairelnak kan hmuh hnu tu ahkhin kan duh ahcun Party Politics ah cun ka rilh vete awk a si deuh lo maw ka ti.

Editor: Delhi, Khrihfabu kipte nih tha pe kho deuh hna seh tiah na duhmi le, Community lei nih tha pek deuh a herh tiah na ruahmi a um maw?

(SH Lian): Aw! Delhi Khrifabu nih tha pe kho deuh hna seh tiah ka duhmi cu Community, Siangngakchia le Mino Bu pawl an cawlcanghnak hi thazaang pe deuh hna seh ti ka duh ngaite. A ruang cu Laimi cu Khrifabu ahhin kan thazaang kan chuah khawh ngai. Khrihfabu cio ahhin zarhkhat ah voikhat kan i tong kho asinain, community pi cawlcanghnak ahcun kum khat ah voikhat hna lawng kan i tong. Cucaah, Khrihfabu nih hin Mizapi hi an kan mongh khawh bik ka ti. Cun, Community lei nih hin Khrihfabu nih biatakte thazaang a herhmi pek hnu in mitam u nih rathnawh chan a simi ah biatakte, tanlak in an cawngcangh ding a si ka ti fawn. Culawng ah mipi tam u nih rathnawh chan hi hlawh a tling lai tiah ka zumh.  

Editor: Nungak pawl nih a lawngkangmi a si maw, a email le pehtlaihnak ding hna rak kan halpiakte an ti le...? (Ka philh dedeng cu..he)

(SH Lian): Hehe… A si maw? Ngah ko ee: salailian89@gmail.com a si lai.

Editor: Careltu na miphun hawi sinah bia siaherh cah na duhmi a um ahcun?

(SH Lian): A pakhatnak ah zeibantuk thil kan tuah hmanh ah kan biakmi Pathian i bochan hna usih! Cun, zeithil kan tuahnak poah ah biatak thlak duhnak lungthin ngei hna usih! Thil kan tuahnak ah hlawhtling lak le tlamtling lak in tuah duhnak lungthin ngei hna usih. 

Editor: Caan na kan pek caah kan i lawm . . .

(SH Lian): Kei zong ka lawm ve! 

 {A tutan ton biaruahnak tuahmi Salai Sang Hnin Lian (Blog) ah len na duh ahcun : VIEW Blog )

(Theihternak: Hi a cunglei Salai Sang Hnin Lian he ton biaruahnak hi Avoi (1)nak Lcc Mekazin 2013 ah rak chuah cangmi a si. Delhi sianginn a dihkate ah Lcc Cazual Editor: John Zilpici Cinzahh (aka) C. Thong Luai Hmung nih ton biaruahnak a rak tuahmi a si.)