FSSAI Nih Noodle, Pasta, Macoroni Brand Thilchuak Dang Zong Chek A Timh

9 June: Nestle India serchuah, Maggi instant noodle khohsuai chungah phung nih telh ding tiah a onhning leng in suan aa telmi a luan ruang le a-chu-muk  (MSG) hmuhchuah a si ruangah India ramchung ramkulh kip ah zuarzamh khap a si hnuah, Food Safety and Standards Authority of India (FSSAI) phu pawl hna nih cun kampani ṭengnge dangdang nih an serchuahmi thil Noodles, Pasta le Macaroni tepawl zong taksa caah a him maw tiah chek hneksak tuah dingah awdar an chuah cang.

FSSAI nih Nestle Maggi Noodle khohsuai phun dangdang ahhin minung ei awkah a him lo an ti hnu khapnak awdar an chuah cang i, kampani zong a thil serchuahmi vialte la dih dingah theihternak thawng an thanh.

Ramkulh dangdang hna zongah Maggi khohsuai hi chek hneksaknak tuah lio an si cuahmah i, a tam-u nih cun zuar an khap cang. Ṭhenkhat ramkulh ah chek hneksak an tuahciami aphi chuak ahcun Maggi ah aa telmi suan hi a him ko timi hmuhchuah si ko hmanhsehlaw a tam deuh ahcun sianhmi rileng an luan dih ti kha an hmuhchuahmi a si ve.

India ram hmun dangdang ah Maggi biatak tein buaipi a hun si hnuah hin, United Kingdom (UK) zong nih kan hnuzarh chungah khan an ramchung ah a lutmi Maggi khohsuai thoh chungah telhmi suan (lead) umzat cu chek hneksaknak a tuah colh hngap ve. Hi Nestle UK nih an serchuahmi Maggi an hun chek tikah zeihmanh a hmaanlonak a um lonak kong le atu kan chek hneksaknak a ruang hi cu ralrin thil ah kan tuahchunmi a si tiah an chim.

Nepal ram zong nih an ramchung ah Maggi khohsuai luhpi le zuar cu an khap ve cang i, Zarhpi ahkhan Bahrain nih Nestle India serchuah a simi Maggi khohsuai cu an ram ah luhter lo dingah an kham ve fawn.

FSSAI nih kampani dangdang pawl hna nih an serchuahmi noodles, pasta le macaroni chek dingah a timi hi ITC, Indo Nissin Food Ltd, GSK Consumer Healthcare, CG Foods India, Ruchi International le AA Nutrition Ltd serchuah pawl kha an si. Chek-nak tuah dingah hin CG Foods India serchuahmi Wai Wai khohsuai le Bhujiya chicken tepawl zong an i tel hna.

Ruah awk: Myanmar (Burma) ram ah zuarmi YamYam le MAME tbk. khi cheknak tuah si ve seh law zei dah an lawh hnga. Eidin tlak an si ko hnga maw?#