SKorea Ah MERS Ruangah Sianginn 2,000 Leng An Khar

9 June: South Korea ram ah Middle East Respiratory Syndrone (MERS) zawtnak rai a ngeimi hmuh chapchuan chin lengmang an si i, nizan zongah khan zawtnak ngeimi mi 23 hmuhchuah chap an si rih.

Saudi Arabia lawng si loin, SKorea zong hi MERS zawtnak rai nih fakpi in a tlunhnak ram a si i, zawtnak a ngei tiah hngalhfian cangmi 87 an tling cang. Kum 2012 ah Saudi Arabia ram ah MERS zawtnak rai hi rak hmuhchuah a si hnu in khan mi 1,000 lengkai nih hi zawtnak hi an ngei cang tiah theih si.

Zawtnak a ngei tharmi an hmuh chap ṭhan lengmang ruangah South Korea nih ralrin thil ah ti’n an ram sianginn 2,000 lengkai cu a khar cang hna.

MERS zawtnak a ngei thar an hmuhchuahmi 23 chungah 17 hna cu Samsung Medical Center, Seoul sizung in zawtnak rai a ngeimi sinin a kai chinmi an si tiah Ministry of Health and Welfare nih an phuanzar. Samsung Medical Centre sizung ah zawtnak rai a ngeimi zat hi 34 an tling cang i, MERS zawtnak zohkhenhnak hmun dang Pyeongtaek sizung ah zawtnak ngeimi 37 an um cang.

Ngandamnak lei hrihhruaitu pawl hna nih cun atu zawtnak rai a ngeimi sizung ah a lengkaimi minung vialte hna cu ripawt i tuah dingah le, an taksa chungah zawtnak rai a um le umlo chek hneksaknak tuah dingah a dang tein  um dingah a ti hna i, hi lengah hin sizung dang zongah lengkai rih lo dingin a nawl hna.

MERS hi kum 2003 lioah a rak tlung bal cangmi, minung 770 lengkai nunnak a rak latu SARS virus zawtnak rai leti’n khan aa lo ngaimi an si i, corona-virus ti a si i, thawdawp thawchuah lei ah harsatnak fakpi a pek hna.  

Hi zawtnak lak hin i venhimnak si (vaccine) an hmu kho rih lo. Si-ai lei thiamsang pawl hna nih cun hi zawtnak rai hi thlitu in i chawnh khawhmi zawtnak a si lo i, hi zawtnak a ngeimi leti’n taksa aa tongh/hnursuannak in i chawnh khawhmi le a karhmi zawtnak hrik a kengmi a si tiah an chim.#