India Ramchung Ramkulh Kip Ah Maggi Khohsuai Zuar An Khap

Maggi Instant Noodles (Maggi Khohsuai)

Nestle Instant Noodle, Maggi cu minung taksa ngandamnak caah ṭihnung a si ti an theihfian hnuah, India ramkulh kip ah zuar dingin an phawtzamhmi chungin chek hneksaknak an tuah cuahmah liopi a si i, chek hneksaknak an tuahmi tam deuh ahcun taksa ngandamnak caah a zatawk telh ding tiah khiahmi leng in suan (lead) telhmi a tam ti kha an hmuhchuahmi cu a si. 

Hi ruangah hin India ramkulh zeimawzat chungah Maggi zuarzamh hi an khapnak a ruang cu a si.

Delhi acozah nih Maggi khohsuai 13 chek hneksaknak an tuah tikah 10 cu suan (lead) a ummi cu minung ngandamnak caah a zatawk rikhiahmi leng a luan timi an hmuhchuah ve. Hi ruangah hin Delhi acozah zong nih Delhi khualipi chungah Maggi zuarzamh cu an khap colh.

Uttar Pradesh ramkulh, Food Safety Authority pawl nih chek hneksaknak (Laboratory) an tuah tikah Maggi khohsuai ahhin suan (lead) hi phung nih a onhmi ri leng a luan ruangah ramkulh kip sinah hneksaknak tuah cio dingah an rak ti hna. Hi lengah hin khohsuai ahhin thawtnam telhzat langhternak (ingredient list) ah an ṭial telhchih lomi, a thawtter deuhnak caah Monosodium Glutamate/MSG (A-Chu_muk) zong hmuhchuah chih a si. 

Ngandamnak lei thiamsang pawl (Health Expert) pawl hna nih MSG (A-chu-muk) hi restaurant rawldawr tampi zongah an hman lengmang tawn, hihi tam tuk ei le eidin lengmang ahcun Nervous System thahri tiang in a hrawhhral khawh tiah an chim. 

UP Ramkulh ah cheknak an tuah tikah Maggi khohsuai ah suan (lead) a um zat cu 17.2 parts per million a ti timi hmuhchuah a si. Hi suan (lead) um ding zat ah phung nih a onhmi zat cu 0.01-2.5 ppm telawng kha a rak si.

Hi atu bantukin Maggi khohsuai taksa caah a him thlu lo, ṭihnung a si timi an hmuhchuah hnuah hin Nestle India kampani share zong 10% in a tla colh ve. Maggi khohsuai hi India ramchung ah a lar ngaingaimi a si. Hihi a bik in sianginn le sianghleirun sianghngakchia pawl hna nih an ei bikmi rawl a si. Kum khat chungah India rampumpi ah billion 15 man hi an zuar khawh zungzalmi a si.

Delhi khualipi ah chek hneksaknak an tuahmi aphi chuak tam u ahcun a him thlu lo timi an hmuhchuah ruangah Delhi acozah nih Nestle India kampani cu tazacuai a timh i, June ni 3 ahkhan Nestle kampani pawl cu meting thutnak zong an tuahpi cang hna.

Kerala acozah zong nih an state chungah Maggi khohsuai zuar an khap i, ramkulh acozah tangah zuarzamhtu pawl dawr 1000 lengkai nih Maggi khohsuai an zuarciami vialte zong an khomhsuat/lakter lio cuahmah hna a si. India ramchung ramkulh 10 ah Maggi khohsuai zuar hi an khap cang tiah theih a si cang fawn.

Haryana, West Bengal le Maharashtra acozah hna zong nih Maggi khohsuai sample cu chek hneksaknak an tuah cuahmah lio hna a si ve. Food Regulatory Body nih rampumpi chung ramkulh kip nih dawr ah an zuarmi sample chek hneksaknak tuah cio i, mah cu aphi chuak an hmuhmi cu ripawt pek cio dingah thanhnak an tuah cang hna. Ramkulh kip ah chek hneksaknak an tuahmi aphi (result) hi tuzarh chungah hin ripawt an tuah dih khawh lai tiah ruahchan an si i, ripawt a luh dih hnuah a herhning in dantatnak lak a si lai tiah an chim.

Hiti thil a sican lio cuahmah Cawnnikhat ahkhan Nestle India kampani pawl hna nih cun an thil serchuahmi ah hin suan (lead) ṭhate le felfaite in chek hneksaknak hmun ah caan hmaan tein cheknak tuah tawn a si kong siseh, Maggi Noodles ah suan (lead) a ummi zat hi phung nih a onhmi ri leng a pet lo tiah an ti ve.

Suan (lead) hi tam tuk ei chih sual a si ahcun kal (kidney), ruh le nervous system thahri tepawl kha a rawhter khawh i, a bik in fim a cawng liomi sianghngakchia ca ko ah ṭihnung a si i, cawnnak lei ah harsatnak a pek khawh hna.

Nestle India kampani nih acozahpi le ramkulh acozah i, FDA authority sinin Maggi zuarzamhmi vialte la ṭhan dih dingah thawngthanhnak zeihmanh kan hmu in kan dong pek lo tiah a chim. Asinatein June ni 3 ahkhan Kishore Biyani hrihhruaimi Future Group nih cun an retail store in Maggi an zuar tawnmi cu an ngol chung rih i, nawlngeitu hna aw/hmurka chuak kha kan hngah rih phot a hau ko tiah a chim.#