Minung ngandamnak caah a him lo tiah ruah a si
ruangah kan hnu zarh Zarhte in khan ramkulh panga nih Maggi instant noodle
khohsuai zuarchuah cu an khap ṭhan hui cang i, hi leti’n hin Maggi hi India
ramkulh 14 ah khap a si cang tinak a si.
Food Standard and Safety Authority of India (FSSAI)
nih Maggi hi la ṭhan dih dingah theihternak thawngzamh ko hna hmanhseh,
Karnataka, Uttar Pradesh le West Bengal belte ahcun khapnak awdar an chuah duh
rih lo.
Pune ah Maggi sample chek hneksakmi paruk chungah
pathum cu phung nih a onhmi lead suan telhzat kha a luan tiah hmuhchuah a si ve
ṭhan i, hi lengah hin a-chu-muk zong aa tel tiah hmuhchuah chap rih a si.
Goa acozah nih an ramkulh ah Maggi sample an chek
tikah thilṭha lo zeihmanh kan hmu lo tiah an chim. Sihmanhsehlaw, ramkulh
dangdang hna nih minung ngandamnak caah a him lo tiah khapnak le phihkharnak an
tuah ruangah zuar rih lo dingin khap a si ve rih ko lai tiah Chief Minister
Laxmikant Parsekar nih a chim. An ramkulh i sample test an tuahmi zong cu
felfai tein cheknak tuahpiak ṭhan dingah Mysore ah a kuat ṭhan lai tiah a chim.
Ramkulh dangdang pawl hna cu ramkulh chung cio ah
hneksaknak rak tuah cio dingah thanh dih an si. Cheukhat ramkulh lebang ahcun
India rampumpi eidin lei chek hneksaktu phu FSSAI nih a him lo tiah an ti
ruangah chek hneksaknak tuah hlan in khan Maggi zuar lo dingah khapnak
thawngzamhnak an tuah dih colh hna tiah theih a si.#
No comments:
Post a Comment