Manipur Ah Martar Pawl Philhlonak Caan An Hmang

Manipur ram mizapi nih an ram chanhhimnak caah nunnak a pemi vialte hna philhlonak caan cu Cawnninga ahkhan an hmang.

Imphal khualipi Kekrupat i Martar pawl thlanmual an tuahmi hmunah cun minung tampi nih upat hmaizahnak caah pangpar an va chiah cio i, hi chungah hin State Deputy Chief Minister Gaikhangam, Commerce and Industries Minister Govindas Konthoujam le MLA Ng Bijoy tepawl zong an i tel ve hna.

Kum 2001, June 14 ahkhan India cozah le NSCN (I-M) nih kahdaih hnatlaknak an phuanmi cu an hunsauh ṭhan i Bangkok Declaration an rak tuah. Hi thil an tuahmi hi mizapi an lungtlinlo ruangah June 18 ahkhan Imphal ah mizapi nih duhlonak an rak langhter tikah cun buainak lianpi a chuak i minung 18 nunnak tiangin a rak liam. 

Hi hnu in hin India cozah nihcun daih hnatlaknak an rak tuahmi cu a rak hnon dih. Hi kahdaih hnatlaknak tuahmi cungah duhlonak a langhtermi nih hin acozah inn tampi an rak khangh tikah, hi chungah hin State Legislative Assembly, MLA official residence le political Party zung tehna zong an i tel hna.

All Manipur United Clubs Organisation (AMUCO) le United Committee (UCM) phu pawl hna nih Manipur ram venhimnak caah a nunnak a thapmi philhlonak ah ti’n June 18 hi Great June Uprising Unity Day ah hmang zungzal dingin an rak tuahmi a si.

AMUCO le UCM hriamtlai phu hruaitu pawl hna nih Manipur mizapi sinah atu a dir liomi acozah le NSCN(I-M) remdaih hnatlaknak kong he pehtlaih in i biakchawnhnak an tuahmi le zeitluk tiang dah an tuah khawhmi cin a si timi ngaihven zungzal dingah an cah hna. Manipur acozah sin zongah Dzuko valley i ramri buaibainak kong hi a daih khawh zau naklai tuanvo la zokzok dingin an nawl hna.#