Thailand Ram Ah MERS Zawtnak Rai A Ngeimi An Hmuhchuah

South Korea ramah zawtnak rai a tlung cuahmah liomi, Middle East Respiratory Syndrome (MERS) ruangah mi 24 an thih hnuah, Thailand ram zongah MERS zawtnak rai a ngeimi an hmuhchuah ve.

Thailand Health official pawl nih cun MERS zawtnak rai an hmuhmi hi kum 75 mi a si i, a lung (heart) zawtnak zohkhenh dingah Omen in Bangkok ah a rak rami a si tiah an chim. 

MERS zawtnak rai a ngei ti an hmuhchuah dih hnuah a dangte zohkhenh dingin innkhan ah an umter kong zong an chim chih rih. Hi atu mipa nih zawtnak rai a ngeih timi an hmuhchuah hlan deuh ahhin minung 60 hrawng he i tonnak an rak ngei manh i, hi a tonmi hna zong hi chek hneksaknak tuah an si lai.

Thailand ram hi sii-ai thiamnak lei in i thlopbul le zohkhenhnak hmunlipi a si i, Middle East ram zong in siseh, mizaw damlomi paoh nih an fuhpanh ngaimi a si. Health Minister Rajata Rajatanavin nih, ‘MERS zawtnak a ngeimi hmuhchuahmi ruangah zapi lungrethei in um hin hlah u, amah le a chungkhat pawl hna cu a dangte ah umter in fimhlawm an si ko cang’ a ti.

Hiti thil a si can lioah hin MERS zawtnak rai a len cukmak biknak hmun, South Korea ah cun nizan ahkhan minung pakhat nih a thihpi ṭhan hoi cang ti a si i, atu leti’n hin MERS zawtnak ruangah a thimi hi mi 24 an tling cang. Zawtnak a ngei tiah theih khawh vial zat hi mi 166 an um cang. Hi pin lengah hin mi thong lengkai cu chek hneksaknak tuah dingah a dang tein umter an si.

Middle East Respiratory Syndrome (MERS);  

-RNA virus group timi phun a si i, minung le saram nih ngeih khawhmi zawtnak a si.

- Hi zawtnak a ngei hmasa bik hi kum 2012 ahkhan Middle East ah rak hmuhchuah a si. MERS zawtnak rai ruangah a thi hmasa bikmi hi kum 2012 June thla ahkhan Saudi Arabia ah a rak cang.

-Hi zawtnak rai zeiti’ndah i chawnhning a si timi hi fiangfai tein an hngal kho rih lo. Virus rungrul hi zawtnak a ngeimi khuh le hathiaunak in a karhmi a si tiah ruahdamh a si.

-Hi zawtnak rai a ngeimi cu an khua a sik i, an khuh pinah thawhdawp thawchuah lei harsatnak an ngei tawn. MERS zawtnak rai nih hin pneumonia le kal (kidney) rawhnak tiang zong a chuahter khawh.

-MERS zawtnak rai a ngeimi chungah zatuak 36% nih an thihpi cang i, damhnak si maw siseh, kaa-kuai-si (vaccine) maw siseh atu tiang an serchuak kho rih lo.#