MERS: SKorea Sizung Ah Rian An Ṭuanmi Cheukhat An Ngol Chung

15 June: South Korea ram ah Middle East Respiratory Syndrome (MERS) zawtnak rai a tlun cuahmah ruangah nizan ahkhan hi zawtnak karh aa otnak hmun tiah zumhmi hmun, Seoul i, Samsung Medical Centre nih cun lakhruak in zohkhenh le hlai a haumi lawnglawng kha luhter an sianh cang hna.

Samsung Medical Centre nih SKorea ah MERS zawtnak rai an hmuhchuahmi dothlatnak an hun tuah tikah, a fiangmi cu zawtnak a ngeimi 70 lengkai hna cu anmah sizung in zawtnak rai a kaimi an si tikah zawtnak rai hi biatak tein ven a herh cang a ti.

SKorea ram ah MERS zawtnak ngeimi an hmuhchuah hmasa bik ni cu May 20 kha a si. Middle East ah sipuazi tuahmi, khualtlawng pakhat nih a rak i phurhmi zawtnak rai a si i, cheknak tuah timhlamh a si lio ahkhan Samsung Medical Center-emergency ward dangdang ah ni thum chung an rak hngahtermi a si tikah, mah hi in hin zawtnak rai hi a karh chin vima tiah ruah a si.

Ministry of Health nih nizan ahkhan zawtnak rai a ngeihmi pasarih hmuhchap an si tikah, MERS zawtnak ngei cangmi dihlak mi 145 an tling cang i, hi chungah mi 15 an nunnak a liam cang. MERS zawtnak a ngeimi atu bantuk in a thimi hna hi kum upa cangmi hna le, zawtnak dang a ngeih chihmi pawl an si.

Samsung Medical Center president Song Jae-Hoon nih kan sizung in zawtnak rai a karhmi cungah mizapi ngaihthiam kan in hal ko hna. Hi thil hna hi kanmah mawhphurh dingmi rian bantuk ah kan i ruah ve tikah biatak tein hi zawtnak rehter nakding caah rian kan ṭuan lai, a ti.

Nawlngeitu pawl hna nih hmun dangah a ummi sizung pahnih zongah hi zawtnak rai a ngeimi hmuh chap an si caah, mi damlo zohkhenh cuahmahmi siseh, sizung rianṭuantu vialte hna zong a lengleimi leti’n i palkai khawh lo dingah an umter hna i, hi lengah hin mi 4,856 hrawng cu an inn le sizung ah chek-nak tuah dingah a dangte in umter an si hna.#