Minung Umnak Dingah Do A Tla Lo Bikmi Khualipi Pawl

Honduras ram khualipi, San Pedro Sula

Mihraang phu pawl nih an buaibai hnahnawhnak pek ruang zongah a si theng lem lomi khualipi umnak dingah do a tla lomi khualipi hi an rak tam lengluang i, a hlei in Latin America hmunram chungah a tam bik hmuh khawh an si. Minung khuasak umnak ding caah do a tla lomi hun ti tikah mithah lainawnnak le thilsual dangdang tampi a tlun tam bikn

ak khualipi pawl kha an si. Hi atu bantuk in khuasaknak caah do a tla lo bikmi khualipi 10 hna cu Latin America deuh ngawt ah an um i, US ram khualipi minthang le lar Detroit zong aa tel chih ve.

Honduras ram khualipi, San Pedro Sula hi vawleicung khualipi daihnak a um lo bikmi le khuasak umnak caah do a tla lo bik a si. Kum 2011 ahkhan i thahnawnnak an tarlanghter ning ahcun minung sing khat umnak chungah a thimi hi mi 159 peng a um khan bantuk a si. 

Honduras hrimhrim hi vawleicung mithah lainawnnak a tam biknak ram zong a si. Zeitluk in dah i thahnawnnak a tam ti cu hitihin a fiang cem lai dah; hi khualipi chungah hin nifatin a thimi pathum an um peng tinak a si. Misual hi a phuphu in hin tampi an um ti a si.

Mexico ram khualipi, Acapulco

Pahnihnak cu Mexico ram khualipi minthang Acapulco hi a si. Hi khua hi zan caan ah thli thiang a ṭhat tuk ruangah a minthang ngaimi a si i, mi zapi nih an panh hnawhchanh biknak zong mah cu ruangah cun a si. Rit-hainak sii lei sipuazi tuahmi phu tampi an um ruangah an khuasak tintuk hi a harsa ngaite. Palik pawl zumh awktlak lo ah an i chuahcanh dih i, ziknawh eihmuarnak hi a tam tuk hringhran. Miruak char ti bantuk thawngpang pawl hi cu an caah thil khuaruahhar a si lo i, a cang lengmangmi thil pangai bantuk men ah an ruah cangmi khi a si. Hi khualipi chung na phanh i, na um lonak ding hmunah a caan lopi i na um a si sual pingpang bak ahcun nun cu i ruahchan ti lo bak kha a tha bik!

Venezuela ram khualipi, Caracas

Venezuela ram Caracas zong hi tlawng theng lem hlah usih law cucu kan nun himnak pakhat a si ve. Hi khualipi hi vawleicung minung tam ning in hun tah ah cun tualthihnak a tam biknak chungah aa telmi a si. I thah lainawnnak a cangmi hi atu lelek a tlung khan bantuk a si i, cuti i thahnawnnak hna zong cu an thihnak a ruang dothlatnak zeihmanh tuah ṭhannak zong um ti loin chiah thlorhmi hna hi an tam ngamsam ti a si. Cu thil nih a langhtermi le sawh duhmi cu mithat lainawngtu pawl hremnak pe loin zalong tein an chuah tawn hna tinak a si. Vok le Ar thih men i va thih a olzan taktaknak hmun a si.

Honduras ram khualipi ṭhiam, Tegucigalpa

Honduras ram khualipi ṭhiam, Tegucigalpa hi khualipi daihnak a um bak lomi le khuasaknak caah do a tla lo bikmi chungah aa tel ṭhanmi cu a si. Metropolitan Cathedral timi biakinn roling taktakmi zong um ko hmanhsehlaw, khualipi chungah khuasami zapi hna hi an ṭha dih theng lem lo. Honduras hrimhrim zong hi vawleicung thah lainawn a tam biknak ram a si kha mu! Minung sing khat peng an umnak hmunah i thahnak hi kum khat chungah, hi khua ahhin voi 83.2 a um khan bantuk a si, natein Honduras ram pumpi kong he hun zulhdawi le hun cuaichun tikah cun a dirhmun a tha leikap ah a tla ve. Asinan, mawṭaw eksiden ton a tam tuk ngamsammi hi thil huattlai le a buai taktakmi cu a si ve. Record hmuh khawhtawk hmanung bik ahkhan mawṭaw eksiden-nak cu hi khua ahhin 246 a um i, hi vanchiatnak ton ruangah a tuartu bik pawl hna cu lamkam ah ke tein lam a lengmi hna le rangleng mawngtu pawl an si diam ti a si.

Brazil ram khualipi, Maceio

Brazil ram i an khualipi lian pakhat, Maceio hi khualipi hnangam daihnak a um lomi le khuasaknak caah do a tla lo timi panganak ah aa tel vemi cu a si. I thahnawnnak ṭhiam hi an i buaipi bikmi cu a si ko. Mi sing khat chungah i thahnawnnak 135 a cang khan tluk a si ve i, Brazil ah cun Rio de Janeiro hi i thah lainawn tam biknak a vun cangtu a si. 

Cuba khualipi, Havana

US ram khualipi pakhat, Detroit

Egypt khualipi, Cairo

Ukraine khualipi, Kiev

Mexico ram khualipi, Nuevo Laredo

Cuba khualipi Havana hi paruknak dirhmun ah a um i, US ram khualipi minthang le hlawhtling ngaimi Detroit cu pasarihnak ah a dir i, Egypt khualipi Cairo cu pariatnak ah a lang ve. Ukraine khualipi Kiev le Mexico ram i Nuevo Laredo hna cu pakuanak le pahranak an si.#