US Ah Biakinn Kahdohnak Ah Minung 9 Nunnak A Liam

Emanuel African Methodist Episcopal Church

US, South Carolina ah Charleston khua i minak pumhnak biakinn cu Dylann Roof (21) nih meithal in a kah hna i, minung pakua nunnak a liam. Hi Emanuel African Methodist Episcopal Church a kah hi Cawnnithum zan Sml. 9 hrawng ah a cangmi vanchiatnak a si i, minung pakua an thih lengah, hliamhma mi pariat nih an tuar.

Palik Department bia chimphuangtu, Charles Francis nih kahdoh a tongmi biakinn pawng ah hin bomb kamh a si ti zong hi thil a can hnu ahkhan biachawkvak a um len tiah a chim. 


Hi ruangah hin helicopter vanzuang hmangin biakinn a pawngkam hrawng vialte cu ṭha tein chek le ngiatthlainak tuah a si. Biakinn kahnak a can cuahmah lio ahhin police chaplain zong a um ve.

Atu tan biakinn meithal in a kaptu hi Dylann Roof (21) tlangval pa a si. Hi biakinn chungah hin suimilam pakhat chung dengte a ṭhut i, aa pumhkhawmh ve hnu ah meithal aa chuah riangmang i atu bangin a kahmi thluahmah hna hi a si. Selby, North Carolina ah amah hi an tlaih khawh cang.

 

Mikaptu an tlaihmi Dylann Roof (21)

 Emanuel African Methodist Episcopal Church hi Charleston khua hmunram i, minak biakinn lian timi le a hlun (upa) bik a si tiah chimmi a si. Kum 1891 ahkhan rak sak cangmi a si i, inn biapi taktak ah ruahmi, ‘Mother Emanuel’ tiah kawh le auh tawnmi zong a si chih fawn. Hi biakinn ah pastor cu Senotor Clementa Pinckney a si i, tutan a thimi lak ah hin amah zong cu aa tel ve.#

*Hi tutan biakinn kahnak vanchiatnak a cangmi kong he pehtlai in Victor Khen Sang nih a facebook timeline ah ‘US Biakinn ikahnak kong ah ralrin awk’ tiah a thaimi cu a tanglei bantuk hin a si. A tialning tein;

US Biakinn Ikahnak Kong Ah Ralrin Awk

-----------------------------------------------------

Nizan South Carolina i Methodist Church ah Mirang pa nih thla acam lio mi hna akah hna i minung 9 an thi, 3 hma an pu. Mah pa hi biakinn chung ah arak lut i nazi pakhat chung hrawng cu daitein apum ve i cu hnu cun atho i akah thluahmah hna ti asi. Nu pakhat cu aluat ter i hiti ka kah mi hna kong hi va chim ati.

Akah dih hna hnu in daitein achuak than i motor avun i mongh mi chung ah alut than i a kal than. Zeidang siloin "huat" rumro ruangah asi ko tiah palik nihcun an puh. Hi bantuk huatnak "Hate Crime" hi zei in dah a chuah tiah cun a huatu hna lawng kha puh loin huat ding dirhmun ah a um mi hna i an dirhmun zong hi tha tein tuaktan in zoh hrimhrim a hau ve.

US ah hin Chin miphun tam ngai phanh asi cang i khuakip kan umnak poh ah biakinn afuh colh mi kan si tikah kan pawngkam innpa ( neighbours) le khuami hna an mitkem ding in biakinn ah kan um sual maw tihi ruah hrimhrim a hau.

Cun anmah Mirang bantuk in dai tein thangthat loin biakinn chung ah lam le au a hmangmi kan si pin ah a caan zong khiah lem loin thlarau hruaining in kan kal ti bantuk in a kalmi zong kan tam ngai tikah kan umnak ram hi zei ram dah a si ti hi ruah in ralring ngai ngai kan hau.

Cun atulio hrim cu ISIS nih hin Europe le US hi an mino hna lungthin chung ah Satan riantuan nak an thlah dih cang i chunzan hlan ah ikahnak le ithahnak hmunkip ah achuak kho dirhmun ah kan um cang. 

Kei ka ruah tawn ning ahcun kan umnak khua cio ah kan biakinn nih mission rian kan tuan nak cio ah kan umnak khua - local ( khuachung) riantuan nak caah donation tete khi chim tlak asi lo hmanh ah tuah ve usih law homeless le si ai nih atleih mi hna cawmnak caah riantuantu hna khi kan si khawh tawk tein bomhnak kutneh tehi langhter ve usih law atha ko tiah ka ruah tawn.

Church pakhat nih $100 te thlakhat ah abomh hna hmanh ah adawh tuk mi asi ko. Cucu ahnu ahcun local newspaper nih atial te lai i hi hna hi thiltha an tuah ko tung timi zohchunh awk tlak tete alang te lai.

Atu kan umnining cu mission rian ti cangka in Kawlram khi kan ruah colh i cu zong cu atha tuk mi asi ko nain kan umnak ( inn le lo cawk in khua kan sak cangnak khua) hi kan thinlung nih akal tak awk asi lo i kan tuah khawh tawk tuanvo ( Local Responsibility) ah itel ve khi atha ngai ka hmuh ko.

Kei hi homeless le drug-addicted pawl lak ah rian ka tuan bal i khi hna lak ah rian atuantu khi church an si hngawt ko. Cucu mithmuh in thiltha tuah asi ko i lung adong cang mi hna thiltha lo chung an va luh thai ding dirhmun in khamhnak zong asi. 

Pathian nih Chin miphun ramleng akan kuat hi kanmah ca lawng siloin kan umnak khua le ram cio ah zohchunh awk tlak lamkaltu tha (good ambassador) si ding ah akan timh mi kan si ti in ka hmuh. Cucu kan tuah sernak in kan langhter ve awk asi ti in ka ruah zungzal.#