Ralkap Pa Le Phe (Playing Card)

Voikhat cu Africa chaklei ralkap bu tlangval rual hna cu buaibainak hmun pakhat ah daihnak a tlun khawhnak hnga an hriamnam he khualtlawn ah an pok.

zarhpini zingkhat cu khuafate pakhat ah Sergeant pawl let’n biakinn ah pumhkhawmhnak cu Chaplain (ralkap sin rianṭuantu pastor) hrihhruainak in thlacam pumhkhomhnak an tuah. 

Thlacam pumhkhomhnak ding caah an tuahmi cauk fate cu an i chuah cio hna i, a ngei ve lomi nih an pawngkam an hawile ta kha an i bawm. Asinatein, cu ralkap chungah tlangval nonal deuh mithar pakhat nih cun phe (playing card) cu aa chuah i, phe cu pakhat hnu pakhat aa lenh len ko.

An Sergeant pa cu a thinkhawih tuk hringhran. Tikah, pumh ṭian dih ah an haotu Marshal sinah a kalpi i, biakinn chungah phe a tongh i, aa lenhmi, pumhkhomh thlacamnak zeihmanh ah a rel lo ning kong tehna kha ripawt a tuah.

Marshal zong cu a thinhung tuk hringhran ve.

Ralkap tlangvalpa sinah cun, “Hi thil na tuahmi kong he pehtlai in, a ṭhatnak a ruang hrilhfiahnak zeihmanh na tuah khawh lo ahhin cun fak taktak in a ka hrem lai ti kha i hngal,” tiah a ti. Cu ralkap pa nih cun, “Ka pu, ni niruk chung bak ke in idin lo tein kan kal cang i, Baibal le thlacamnak cauk ka ken lo. Asinatein, thil kaa kenmi ka phe (playing card) hi zeitluk in dah a sunlawi timi na hngalh ahhin cun na khuaruah hi a har lei hnga dah,” tiah a ti hnu, hiti hin phe konglam cu a chim.

Ka pu,

- Phe i, zatkhat ka hmuh ahhin Pathian pakhat lawng a um ti hi ka hngalh zungzal.

- Zathnih nih Baibal ah Biakam Hlun le Biakam Thar ka hngal ṭheo.

- Zatthum ka hmuh ahhin Pa le Fapa le Thiang Thlarau ka hngal zungzal tawn.

- Zatli nih hin Thawngṭha ṭialtu minung pali Mathai, Marka, Luka, le Johan hna an um timi hi ka hngalh zungzal hna.

- Zatnga ka hmuh ahhin an mei inn zinan nih a dihtakmi, mi zinan halvak, nungak thiang panga hna kha a ka ruahter ṭheo.

- Zatruk nih niruk chungah Pathian nih van le vawlei a ser dih ti kha a ka hmuhsak i a ka theihter.

- Zatsarih nih Pathian cu ni sarihnak ni ah aa din i, hi ni hi a Ni Thianghlim ah a dangte in a chiah ti kha a theihter zungzal.

- Zatriat nih hin buanchukcho lioah Pathian nih Noah te chungkhar mi 8 a khamh hna timi a ka philhter lo.

- Zatkua ka hmuh ahhin thinghmui hma zawtnak a dammi minung pakua lawmhnak bia chimnak cang zong a hngallomi pawl kha a ka a ka theihfianter.

- Zathra nih hin Pathian nih a kan pekmi, Nawlbia Pahra a ka theihter tawn.

- Jack ka hmuh ahhin Khuachiapa, Setan ka thei tawn.

- Queen nih Nungak Thianghlim Mary a ka theihter rih hoi.

- King ka hmuh ahhin siangpahrang (Pathian) pakhat, zeizong thilti khotu kan ngei ti hi a ka hngalhter tawn e.

- Phe (playing card) nambat vialte le Joker fonh dih ahhin 365 a um i, kumkhat ah Ni um zat bak a sawh.

- Phe hi a dihlakte ahhin 52 an si. Cucu kumkhat ah zarhpi umzat an sawhkhih.

- Phe ahhin milem a cuangmi 12 an um. Cu nih a sawhkhihmi cu kumkhat ah thla 12 a um ti kha a chim.

- Phe ahhin Tawka, Pana, Ṭial le Zum phunli an um. Hi zong nih hin thla khat chungah zarhpi voili zat ciah kha a langhter fawn.

‘Cu ruangah cun, Ka pu phe hi ka caah cun baibal tluk cu a si ka ti lo, natein ka cauk sunglawi taktak cu a si ve dah kaw’ tiah a leh e ti a si.

(Theihternak: Hi a cunglei ‘Ralkap pa le Phe’ timi hi Valpuia Leo Chawngthu tialmi kha aa tlakning in hun leh chinmi a si.)