Bangladesh Ah Islamist Haotu Hrithlai In An Thah Cang

Bangladesh ram, Jamaat-e-Islami Party haotu Motiur Rahman Nizami cu nizan zing ahkhan hritlai in a nunnak lak a si cang.

Kum 73 upa, Nizami hi Dhaka ah International Crimes Tribunal court biaceihnak zung nih thi dingin a bia an chahpiak diam cangmi zong a rak si bal i, atunai chung hrawng ah Jamaat-e-Islami hruaitu hrithlai in an thahmi a pali-nak a si.

Nizami hi Bangladesh nih Pakistan lakah Independence a khel cuahmah lio hrawng, kum 1971 raldohnak a tlun lio caan ahkhan, amah miphun hawi cungah sualnak tampi a rak tuahtu a si tiah mawhphurhter a si. Minung tampi a thatnawngtu, le tlaihhremtu le serhsattu a si tiah puh in, tazacuai hnuah atu bang hrithlai in a nunnak lak a si. Ral si tukdoh lio caan i, Bangladesh independence khel dingin hriamtlai phu a dirhtu, Bangladesh independence a ṭanhtu le duhtu pawl hna kha Pakistan ralkap pawl sinah a chim i, a thahnawnter tawn hna tiah sualphawt a si.

Kan hnuzarh ahkhan Nizami a bia an chahpiakmi kongkau ah a biaceihpiak ṭhan dingin nawl halnak an tuahmi cu hnonpiak an si i, hi hnuah hin President Abdul Hamid sinah ngaihthiam halnak a tuah duh lo ruangah atu bangin hrithlai in thah a sinak hi a si.

Dhaka ah hrithlai in thah a si lai ahhin a tlaknak thonginn lenglei ah minung tampi an i pumkhawm i, sualnak a tuahtu thahnawn a si dingmi cu an i lawm ngai ti a si. Hiti a bu in aa pumkhawmmi mizapi cheukhat nihcun Nizami hmanthlak an ken i, heh tiah an vuak an soksam lem.

Hiti thil a can cuahmah lioah hin Jamaat-e-Islami party nihcun Nizami cungah a dikning le hmaanning tein a bia ceihpiak  a si lo tiah an soisel i, politics lei he pehtlai in phuhlamnak caah hman a si, an ti. Nihin ahhin lungtlinlonak langhter dingin rampumpi ah timhlamhnak an ngei. Hrithlai in thah a si hlan deuh te ahhin a chungle hmuhternak caan pek a si i, a ruak hi Bangladesh thlanglei an khua ah phum a si.

Bangladesh hi kum 1971, December ni 16 khan independent ram pakhat ah a hung cang i, independence an khel lioah ral i tuknak ah a thimi minung zeizet set dah an si ti kha a dikdiar in hngalh thlu khawh a si lo. Bangladesh acozah nih minung million 3 hrawng si in a chim. Asinain independent researcher pawl hna tu nih cun sing nga an si tiin an chim ve. Cc. Vanglaini