Thli Thurhnawm Nih Cancer A Chuahter Khawh

University of Birmingham le University of Hong Kong nih hlathlainak an tuah tikah an hmuhchuahmi cu minung hna nih kan dawpmi thlitu a thurhnawmh ahcun cancer zawtnak phunphun a kan ngeihter khawh ti kha an hmuhchuah tharmi a si.

Thlitu a thurhnawmhnak hmunhma ah saupi um, khua kan sak ruang ahhin cancer thihnak zong hi a karhchin vima ṭheo tawn tiah hlathlainak an tuahning in an hun langhter i, hi cancer ngeih lawng hmanh si loin zawtnak phun dangdang zong ngeihchih a fawite tiah an ti rih fawn. 


Thilsiamnak hmun tampi le mawṭaw tamnak hmun ahhin thlitu a thurhnawmh hi a zualhma khun i, hi bantuk hmunhma pawl i kan um tikah, kan mit nih a hmuh khawh lomi thlitu thurhnawm, mei dap pelpawi bantuk a simi thil khuvai tampi a um, cu bantuk thil pawl cu minung nih caan sau nawn chung a dawp lengmang tikah cun cancer phunphun a ngeih khawh.

Thlitu khuvai hi power generation tehna, mawṭaw phunphun khuvai le thil dang tampi nih an chuahtermi a si i, thlitu a thurhnawmh tuknak hmunram ahcun cancer ruangah a thimi hi zakhat ah 22% in a tam deuh khun kho ti a si. Thlitu thurhnawmh, khuvai a tambiknak hmun pawl cu khualipi lian paoh ah a tam i, a zualhma chin lengmang, cu nih cun khuachung ah a ummi minung hrangah nikhat hnu nikhat harsatnak kha a tamter chin lengmang ve.

Hong Kong khualipi ah kum 65 in a cunglei mi 66,280 sinah hlathlainak an tuah hnu i, an hui hmuhchuah nolhmi ahcun zeitluk in dah thlitu thurhnawm le khuvai thianglomi a tam ning le ṭihnun ning hi theihhngalh thlu khawh a ti lo i, atu bangin thlitu thurhnawm khuvai a tam chin lengmang bantuk hin, cancer ngeih khawhnak ding chance zong a sang chin lengmang ve ti a si.

Vawleicung pumpi ah India ram hi thlitu thurhnawm neknawi, khuvai thianglo a chuahtertu lakah aa telmi pakhat a si. India nih thlitu thianhhlimh lei aa zuam i a thangcho chin lengmang ti lioah, thlitu thurhnawm a chuahtermi zong hi a tam chin lengmang ve ti a si. 

India ah hin thil sernak sehzung hmun tampi in thlitu thurhnawm khuvai ṭhalo lengah, innchung tang i filhhnomh tuk ruang in a rak chuakmi thlitu hnawm khuvai, mei kaunak meikhu le a dangdang thil thurhnawm, khuvai ruangah thihnak le ngandamlonak a tam chin lengmang ti a si. Cc. vanglaini

(Kan zatlang umnak hmunram a thianhlimlo hmanh ah kan innchung le pawngkam thianghlim tein tuah khawh peng i zuam cio hna usih! I thianhhlimh cu ṭhancho a si)