Vawleicung Tlangsangbik Everest Tlangpar Kai An Ot Ṭhan Cang

Sherpa timi tlangkai thiam phu hna cu Nepal ram vawleicung tlangsang bik, Mount Everest ah kai an i thok ṭhan kho cang. Tutan hi kum hnih Everest tlangkai dinh a hun si hnuah an kai a hmasa bik avoi khatnak a si.

 

Official lei nih Sherpa pakua hna hi cawnnithumni khan meter 8,850 (feet 29,035) a sannak hmun tiang an phan kho cang tiah an chim.

May thla hi Everest thlang kai a rem le ṭhat bik caan a si. A luancia kum hnih ahkhan an ram ah lihnin ruangah rawhralnak fakpi a tlung i, Nepal i tlangkaimi tiang hin zor lei an panh chin lengmang. Hi li aa rak i hnih ahkhan hawrhra a cim/min a rak fah tuk ruangah tlangkai minung 18 an nunnak a rak liam phah i, kum 2014 ahkhan hawrhra cimh ruangah Sherpa 16 an rak thi bal cang fawn.

Nepal Mountaineering Asscociation President Ang Tshering nih Sherpa pawl hi tuante ah tlangpar zik phanh i tim ko hna hmanhseh, tlangpar zik phak hlan meter 70, Hillary Step pawnghrawng hi kal a harsat ruangah an i timhning nakin caansau deuh an lak e tiah a chim.

Kum hnih chung bak Everest tlangkai dinhter a si hnuah Nepal ram nawlngeitu pawl hna nih tlangkaimi pawl kha Everest tlangkai a ngah ṭhan cang taih an sawm ṭhan hna. A luancia kum hnih lioah permit an rak pekchuah cangmi pawl hna zong kha an dihlakte in cohlanpiak an si ṭhan dih. Department of Tourism nih Nepal ram ah tlangkai, ramdang mi 700 lengkai an um cang tiah a chim.

Tukum ah hin Nepal cozah nih avoi khatnak tlangkaimi pawl nih an hman dingmi hriamnam, hri le herhmi thil dangdang zong helicopter hmangin thiarchuah ding kha a onh fawn hna. 

Hi hriamnam thilri pawl hi a tir ahkhan cun Sherpa pawl nih hin an kenpiak ṭheo tawn hna, natein lihnin ruangah Khumbu Icefall ṭih a nun chin lengmang caah helicopter hmangin chiah dingah an duhsakpiak hna hi a si. Cc. vanglaini