James Bond Film Ah Film Tambik Aa Thlami Sir Roger Moore Cancer In A Nunnak A Liam

Sir Roger Moor

Vawleicung mi tampi nih uar a hlawhmi James Bond film, a James bond-tu bik ah ruahmi, James Bond film i 007 agent ah caan saubik, film tambik a cangtu, Sir Roger Moore (kum 89) cu Cawnnihnihni ahkhan cancer zawtnak in a nunnak a liam ruangmang.

Entertainment vawleipi ah cangtu roling le mi theihhngalh a tongmi, British ram upatnak laksawng sang bik a si tiah ruahmi min hmai ah ‘Sir’ ti tiang in aa khenh khomi Roger Moore cu cancer zawtnak a ngeih hnu tlawmpal ah a zawtnak ingtuar kho ti loin a nunnak a liam.

Roger Moore a thi timi hi a fale nih, “Lungfak le ngeihchia bu tein kan pa, Sir Roger Moore nih cancer zawtnak in a zawt hnu tlawmpal ah, Switzerland ram ah hi vawlei nunnak in aa din cang timi cu kan phuan a hau cang. Ralṭha tein hi a zawtnak hi dam kho dingin a thazaang um ek in tei khawh aa zuam peng mi a si e,” tiah an ti.

A fale nih kan pa nih a duhning bantuk tein ruakvuinak cu Monaco ah pumpak thlan hmun ah a sit e lai tiah an ti. A fale nih kan pa nih a damchung ah a hlawhtlinnak bik a si tiah ruahmi cu UNICEF caah papek in a ṭuanmi hi a si tiah an chim.

Roger Moore nih a fale pathum, a nupi hmanung bik, Kristina ‘Kiki’ Tholstrup a taantak hna.

Roger Moore hi kum 1927 October 14 ahkhan Stockwell, South London ah a rak chuak i, a min dihlak hi Roger George Moore a si. James Bond film ah hin Sean Connery aa thlak ti lo hnuah aa thla i, kum 1973 ahkhan Live and Let Die kha James Bond film ah aa thlak hmasa bikmi film a si.

James Bond film aa thla cangmi vialte lakah film aa thla tam bik a si i, James Bond film pasarih tiang aa thla manh. James Bond film ah aa thlak hmanung bik cu A View To A Kill kha a si i, kum 1985 ah aa thlakmi kha a si.

Film a thlak hmasa bik cu kum 1937 i, Double Wedding kha a si. Hi hnuah hin film minthang lar taktak ah aa thla len rih hoi hna i, cu lakah cun Ivanhoe (TV series), The Saint (TV series), Romulus and the Sabines, The Wild Geese, The Quest tehna hi minthang bikbik aa thlakmi an si men lai dah. Movie pangai ah a cannak hmanung bik cu A Princess Christmas kha a si i, kum 2011 lio ahkhan a si.

James Bond Film Aa Thlakmi Pawl cu;

1.         Live and Let Die (1973)

2.         The Man with the Golden Gun (1974)

3.         The Spy Who Loved Me (1977)

4.         Moonraker (1979)

5.         For Your Eyes Only (1981)

6.         Octopussy (1983)

7.         A View to a Kill (1985)

Nunphung le zatlang ṭhanchonak hrang le mi bawmhchanhnak lei hi biapi tak ah a ruatmi le aa pumpemi pa zong a si. Hi ruangah hin kum 1999 lio ahkhan Order of the British Empire timi upatnak rak pek a si i, kum 2003 June thla ahkhan rak kaiter a si hnuah, Knight Commander sinak pekchanh a rak si i, a min hmai ah ‘Sir’ timi aa chiah khawhnak a ruang zong cu a si.

Kum 2007 ahkhan Hollywood Walk of Fame ah an rak luhter i, kum 2008 ahkhan French cozah nih Commander of the Ordre des Arts et des Lettres sinak a pek. Kum 1991 thawk in khan UNICEF nih Goodwill Ambassador ah ṭuan dingah rian an rak khanh. Cc. BBC, Wikipedia